FREDI BREUNIG

Fredis Glosse

Die Juchend vo heut' (Mundart)

26.06.2018
So! Schluss. Aus. Fertig. Die Dooch werrn widder kürzer. Für mich jedes Johr a traurige Erkenntnis. Wochen- unn moonedelang isses aufwärts gange unn jetzt gedds rückwärts. Desweeche versteh ich’s aa nedd, wie merr zu den traurige Anlass üüwerool Freudenfeuer (Sonnwendfeuer) oogebrönn konn. Do gidds doch nix zu feiern! Sowos ghörd n Winter gemochd, wenn die Dooch widder länger werrn und‘s widder aufwärts gedd. Mache se in Salz seit s vergange Johr scho. Die denke mit! Der junge Leut würrd doss wurschtegal senn. Die feiern sowieso ömmer, egal ömm woos gedd. Blakaade aufghängt, a Fooß Bier oogstoche, a Flösche Asbach noo die Wand genoocheld, Grill, Musik, los geht’s! Ja, ja, die Jugend vo heut. Würrd ömmer raffinierter! Neulich hömm bei Marktheidenfeld a sechs- unn a ochtjähriger s Auto vo die Mutter genomme und a Spritztour gemocht. Sechs unn ocht Johr alt! Do senn mir früher grood amoll Bonanzarood gfohrn! Und: so lang der sechsjährig gfohrn is, ging‘s gut, owwer kaum iss der ochtjährig oos Steuer, hodds gekracht. Egal. Die Jugend iss wichtig! Blutspender-, Fachkräfte-, Nachwuchsmangel, wo merr bloß hie guggt! Die Handwerker werrn ball veröggd! Finne kee Stifte merr. Und hömm domit zu wenig Leut, ower jede Menge Arwerd! Die Leut renne rer die Bude nei! Du konnsd dich heut jo als Handwerker vor Äufdreech nedd gerett! Die hömm dehemm wohrscheinlich scho Angst, wenn’s Telefon klingelt und scho widder eener woss gemocht hob well. Vo die Betriebsauto würrd die Werbung roogekratzt unn wenn se irchendwoo of a Baustell senn, frääche se n Bauherrn, ob se nei sei Karaasch fohr döffe, dess kee annerer s Auto sidd unn n Handwerker bein Feierabend oobassd unn biddeld unn baddeld, däss er n Aufdrooch oonimmt. Verkehrte Welt! Ich sooch’s jo, die Jugend iss heutzudooch sowoss vo wichtig und mer konn ner bloß oo die Leut abbelier, Kinner nei die Welt zu setzte, däss für Nochwuchs gsurcht iss. Monche Leut senn do regelrecht vorbildlich und fange so ball wie möglich domit oo. Hobb ich neulich erschd widder gemerkt, als ich in die Stodt zughört hobb, wie a junge Mutter mit ihr Töchterle gezankt hodd: „Doss iss also die Jugend vo heut! Mit 16 Johr jeden Oowerts midd n annere furrd, owwer der Mutter ihr‘n 30. Geburtsdooch vergess! Doss sidd dir ähnlich!!!“ Ja, ja, die Jugend vo heut. Servus, der Eustach.

<< zurück