Nedd selten hört mer jo Leut jommern unn neidisch stöhne: „Mensch, wie schöö wäärsch, wenn mer a brominenter, berühmter unn reicher Mensch wär! Merr bräucht sich kee Surche merr zu mache und hätt ausgsurcht.“ Brominent unn berühmt? Nedd ömm alles in die Welt! Stell dir ner bloß amol vuur, du wärscht als Moo Fußballtormann und spielest bein FC Liverpool. Du hässesd Karius unn hässd ins Chambions League – Endspiel vuur hunnerd Millione Zuschauer zwee Öpfelich neigrichd wie noch keener vuurhar. Hör mer auf! Odder du bist a Fraa unn wärschd die Meghan, seit kurzem middn Prinz Harry vo England verheiert. A Draum? Von weechn! Kaum bist du mit den Traumprinz verheiert, musst du in die Zeitung laas: „Meghan: Wenn sie bis Februar nicht schwanger ist, hat sie ein Problem“. Stell dir amol den Druck vuur, der do entstedd! Odder du bist a Fraa, hässd Melania, wohnst in Amerika und bist middn grössde Idiot verheiert, der zur Zeit off Gottes Erden römmlefft. Erscht wollt er sich mit seinesgleichen, n Kim Jong Un, dreff, dann nedd, dann vielleicht, jetzt doch. Wenn er, der Donald, sich woss zuss Owertsesse wünscht, well er wohrscheinlich erscht Sauerbrooda mit Klöss, dann doch nedd, dann vielleicht und am End doch. A boor Nummern glenner gfällig? Du bist Chef voss Straßenbauamt, müsst die Soolbrögge zwösche Neuscht unn Mühlbich/Salz odder die BayWa-Kreuzung sperr unn weeche dir geht’s scho so weit, däss Leut drohe, offenanner zu schisse! Hör mer auf! Noch schlimmer: du wärscht a maßgeblicher EU-Bolidigger unn müssest a trächtige Kuh derschiss läss, nerr bloß weil die - wie neulich tatsächlich bassiert - beis Fresse in Bulgarien die EU verlässe unn kurz in Serbien gegroosd hodd. Wollt widder zurück in die EU, durft owwer nixmer und sollt gemeuchelt wär. Die EU!!! Ich sooch nur: Datenschutzgrundverordnung!!! Jeder Verein mit mehr wie neun Mitglieder braucht jetzt n Datenschutzbeauftroochde, s döffe kee Bilder merr vo Veranstaltunge gemocht weer, wenn mer nedd vurhar jeden enzelne fräächd, ob er doss aach well! Geht’s noch? S passt irchendwie nedd zomm! Off die ee Seite extremer Datenschutz, owwer wenn du heut off n öffentliche Abort gessd, hängt a Zettel oo die Waand, wo du fein säuberlich eidrooch musst, wie du hässd un oo woffern Dooch du wie viel Uhr dei Gschäft gemocht hossd. Hör mer auf! Servus, der Eustach.