Jeder, der schafft (odder zumindest off die Ärwet muss), müsst jetzt voll entspannt unn bestens erholt sei: seit 28. April bis heut gabs insgsamt 32 Dooch. Wenn mer dovo alle insgsamt 15 Samsdich, Sonndich, Feierdooch unn Brüggedooch obzieht, bleiwe grood emoll 17 Dooch, oo die gschafft wer musst. Fast halber/halber. Der Mai: mit Brüggedooch drei mo drei Dooch, eemol vier Dooch und nerr bloß eemol fönnef Dooch die Woche müss schaff. Gab’s aa noch nedd. Es iss halt alles a Frooch vo die berühmt Verhältnismäßigkeit. Wo mer in normale Mooned im Schnitt zwee Drittel schafft unn ee Drittel frei hodd, wor doss jetzt im Wonnemooned Mai halt amoll ganz annersch unn richtig unverhältnismäßig verdääld. Schöö – für die Arbeiter! Die hömm doss sowos vo verdient, wenn mer bloß bedenkt, wie ungerecht unn unverhältnismäßig s Geld, sprich die Löhn unn Gehälter, in unner aller Deutschland verdääld senn. Der Martin Winterkorn, Ex-VW-Chef zum Beispiel, hodd in Spitzenzeiten sage unn schreibe 16,5 Millione Euro im Johr gricht. Vo verdient well ich goor nedd reed. 16,5 Millionen! Irchendwie konn merr solche Summen nedd richtig eigeordne, wenn merr sich nedd mit bestimmte Vergleiche behölft. Ich prowiers amoll. Der Mindestlohn in Deutschland iss allerweil 8,84 Euro bro Stonn. A Mindestlohnempfänger(in) verdient domit ungfähr alle siewe Minudde n Euro. Wenn mer also ömmer nei die Händ klatsch dääd, wenn a Mindestlohnempfänger(in) n Euro verdient hodd, müssd mer siewe Minudde worrd und dann eemol klatsch. Und jetzt künnts: a Martin Winterkorn hodd bei 16,5 Millione im Johr alle 0,6 Sekunde n Euro ghood. Bis der Mindestlohnempfänger also een lommberde Euro gricht, hodd mer bei’n Winterkorn scho 700 (!) mo geklatscht. Verrückt, odder? Merr könnt aus die Haut gefohr bei so viel Ungerechtigkeit! Ower jetzt hodds unnern Freund Winterkorn derwöschd! In die USA würrd geeche ihn weeche n Dieselskandal ermittelt unn wenn er, der Maddin, in die USA eireis dääd, wääred er sofort festgenomme. Muss merr sich vuurstell: du hossd 16,5 Millione pro Johr, könnst braggdisch jede Woche nooch New York, Chicago, Los Angeles, San Francisco, zunn Grand Canyon unn wääs der Deifel noch wo hie. Konnsd owwer nedd, obwohls Vermögen zweifellos do wär. Tja, wie seechd mer do so schö: Domm gelaffe! Mei Bedauern hält sich in Grenze. Servus, der Eustach.