Es iss scho komisch: ömmer, wenn mer n Noome vo irchend a Durf odder a Stodt hört, denkt mer oo woss ganz bestimmts. Wenn ich zum Beispiel „Nüdlinge“ hör, denk ich sofort o Serpentine. Ganz gloor, worömm! Scho als Kind hossd du gewösst, dässes, wenn mer vo Nüdlinge nooch Kissinge föhrt, Serpentine nauf gedd. Vill vo dene ganz markante Straßenverläuf gidds eh nix merr. S „Lang Schiff“ iss so a Baradebeispiel. Do wenn’s – egal vo woffer Richtung – drauf zu gange iss, hodd der Vodder scho ömmer zu uns gsocht: „Bassd auf Kinner, jetzt künnt es lang Schiff!“ Und dann hossd du dich fast wie in Amerika gfühlt, wie du vurnaus geguggt und die kerzegrood Senke gsenn hossd. Ein erhabenes Gfühl, wenn der Vodder no mit sein Ford 17M durchgebfuzzert iss! Schö worrn aa zwee Hüggelich zwösche Eyershause unn Trappscht. Wenn merr 100 gfohr iss, hodd merr kurz ooghoowe! Sensationell. Ja, zurück zu Nüdlinge. Do bloond mer jetzt grood a Umgehung und s würrd heftig drüü gschdridde, ob’s Richtung Kissinge links oder rechts oo doss vonn Verkehr gebloochds Durf vorbei geh söll. Die boor Dooch woor widder a Info-Veranstaltung und in a Präsentation voss Straßenbauamt woor zu lese: „Dauer der noch ausstehenden Planungen: 114 Monate. Dauer der Bauphase: 24 Monate.“ Insgsamt 11 1/2 Johr! Do wenn du so 80 Johr alt bist und oo die Hauptströss wohnst, konnsde dich jetzt scho of Durchgangsverkehr bis zu dei Hinscheiden eigstell. Aach in Neuscht würrd tüchtig weitergebloond und gebaut. Brögge üüwer Brögge, alle mit Gelänner. Doss oo die Falaiser Brögge söll 1,1 Millione kossd! Unglaublich! Und die nächst Brögge, vo die noch keener woss ohnt, seh ich jetzt scho vuraus. Die gädd irchendwenn üwer die BayWa-Kreuzung. Fohr amoll stodtauswärts und bieg oo die BayWa links Richtung Brend ob. Sowoss vo kabudd! Ohne Brögge künnsde do ball nixmerr nü!!! Und: die Soolbrögge Richtung Mühlbich/Salz muss saniert wär und wüürd heuer n Sommer üwer a halbs Johr gsperrt. Do geht der ganz Verkehr durch Salz und ich seh jetzt scho die folchend Szene vuraus: a Moo browiert a halbe Stonn lang weechn Verkehr vergeblich, medde in Salz bei die Pizzeria vo ee Seite vo die Ströss of die anner zu komme. Düüwe sidd er a Kind und rufft: „Wie künnt merr do nü???“ S Kind: „Wääs ich nedd, ich bin do hüüwe geburrn!“ Servus, der Eustach.