So, n gnabbe Dooch noch, no schnaufe alle Faschingsmuffel landauf, landab tief durch unn sooche sich: „Gott sei Dank, endlich iss der Zirgus widder römm!“ Obwohl der Fasching heuer jo richtig kurz woor. Owwer wenn mer irchendwoss nedd moch, no senn halt selbst a boor Woche zuvill. Sei’s dröm. Aus mit Helau-Schreies, Dusch-Spieles, Schunkeldour unn wosses süsst noch für Quälereie für Leut gidd, die die Fosenocht nedd möche. Schluss mit lustich! Murrn iss Öschermiddwoch unn ab doo befasse mer uns ner bloß noch mit Zeug, woss die Welt wallich intressier muss. Die Bio-Welle zum Beispiel. Iss mittlereil so hoch unn mächtig, däss sich alles ins Geechedääl ömkehrt. Bei die Hünner unn ihr Äär zum Beispiel. Johrelang hömm sich vill Leut of Äär vo glückliche (Bio-) Hünner ömgstellt, die vill Platz, Auslauf unn frische Luft hömm. Mit der Zeit hömm die Bio-Hünner, die jo irchendwo aach bloß Hünner senn unn vo ihrn Riesenerfolch gornix wösse, zu dunn, n Bedarf oo Bio-Äär zu degge. So gidds jetzt schon Ställ mit Bio-Hünner, die oo die laut Öko-Verordnung maximal zulässig Zohl vo 3.000 römmgratze. Und wenn du zum nächste Stohl a weng Platz lässt unn die Hünner genug Auslauf hömm, konnst du weeche mir zehn Ställ neeweenanner gstell und so 30.000 Bio-Hünner ghalt. Iss dess dann aach noch Bio, wenn a Huh – off Hünner bezooche - in so a Mega-Metropole lebt unn doo ihrn Dienst dudd? Wenn doss so weitergädd, werrn die gebloochte Hühner in die Legebatterien arbeitslos, dodurch wenicher unn hömm of eemol Platz! Domit werrn se quasi zu Biohünner und s Bendel schlööd zurück. Eine verrückte Welt! Ja, die hömmer zweifellos. Gugg dir nur die Aufrechung oo, wie se sich nooch die Brunksitzung in Veitshöchheim weeche s Gedicht vo die Oberpfälzer Feuerwehrkabell üwer die Madame Macron ergeewe hodd. Bis nei die Bild-Zeitung unn n Focus hodds die Kabell gschafft unn ihr Reim‘, die jo wallich nedd müss sei hädde, senn rauf unn roo diskutiert wurrn. Ja, es senn annere Zeiten. Alles, wo sich früher kees drüü aufgereecht hodd, konnst du nixmerr breng. „Me too“ lässt grüßen. Obwohl ich neulich meiner Ohrrn nedd getraut hobb, wie a Fraa in a Durf, dessen Noome ich jetzt bewusst wegläss, entrüst losgelässe hodd: „Ich wäss nedd. Üüweroll of die Welt werrnn Weissbiller sexuell belästigt, bloß mit unner Dröödel dudd sich nix!“ Servus, der Eustach.