Landauf, landab häufe sich die Brobleeme unn Beschwerden üüwern Biber, der bei uns widder heimisch gemocht wurrn iss. Ihr hobbt sicher scho drüü gelese. Der Biber fällt massenweis Baame oo sein Fluß, baut domit sei Biberburg und stauts Wasser auf. Obgsänn fo die gfällte Baame, läffts Wasser nei die Felder und mecht se soo feucht, däss die Bauern mit ihr schwerre Maschine nix merr drauf könne und sich beschwern. Ja, ja, nedd eefoch zu sooche, obs jetzt gut und wichtig iss, däss der Biber widder doo iss odder nedd. Viel Leut dääde aach ohne Biber gut weiterleb. S iss sowieso ungerecht, wie unterschiedlich der Mensch mit die verschiedene Tierlich ömgeht. Wirbeltiere hömm zum Beispiel n ganz annere Status wie Insekte. Beispiel Biber: irgendjemand schlööcht vuur, däss er, der Biber, wieder heimisch gemocht wer muss, weil er vom Aussterbe bedroht iss. Mit einem Riesenaufwand und viel Geld würrd doss Projekt gstart und es geht aufwärts mit dem possierliche Tierle. Und stellt euch im Vergleich amol vurr, dässes kee Schnogge mer gäb, die uns n Sommer Dooch unn Nocht blooche. Die ganz Welt dääd doch aufschnauf und jubel: „Hurra! Endlich hömm merr Ruh vuur die Schogge-Deifel!“ Und dann käme ein Naturschützer off die Idee, die Schnogge widder heimisch zu mache. A Abordnung föhrt noch Schnackenwerth (do gidds wohrscheinlich jede Menge zu käffe) und holt zwee, drei Kürb vo die Bloochgeister. Offn Durfplatz versammelt sich die Ortsbevölkerung, die Musik spielt, Presse, Funk, Fernsehen, Landrood, Doro Bär, alles do. Dann werrn die Deggel vo die Kürb aufgemocht, die neue Schnogge schwärme aus und senn widder heimisch. Proteste aller Orten! Oder doch nedd? Stichwort Glyphosat. Wie schnell sich doch die Meinung üüwer a Thema geänder konn! Höchstwohrscheinlich weeche Glyphosat unn Konsorten gidds ömmer weenicher Insekten und doss konn sich zu a Riesenproblem entwiggel. S gidd ömmer weniger Bie und die Vögel hömm mit die Zeit nix merr zu fresse. Die Katze dann a nix merr und dann die Hünd. Hodd neulich erscht eener ins Fernsehen gsocht, däss er sich frää würrd, wenn er sei Windschutzscheibe vos Auto widder vo Insekte sauber mach könnet. Dann wär die folchend Frooch widder zu beantworte: Wo dro erkennt merr n freundliche Motorroodfohrer? O die Mugge zwösche die Zähn. Servus, der Eustach.