Fachleut sooche, dässes nie mehr so a grösse unn wohlhabende Rentnergeneration wie alleweil gebb würd. Muss so sei. Storrge Johrgäng, die ihr ganz Laawe lang fleißig gschafft hömm und dessweeche a gute Rente hömm, gehn jetzt Johr für Johr in ihrn wohlverdiente Ruhestand und genieße s Laawe. Busunternehmer mache mit Seniorenausflüüch s Gschäft ihres Lebens, grieche owwer langsam Brobleeme, Fohrer zu hömm. Die Alte gänn in Rente …… Hömmersch scho widder. Ächentlich müsst jeder Rentner jo a hochzufriedener Mensch sei. Doss, off woss merr ömmer drauf hie geärwert hodd, iss endlich doo, merr muss früh nix merr raus, der ganz Druck iss wagg und a wohlverdienter Ruhestand licht vuur een. Isses so? Senn alle Rentner (unn Rentnerinne) wallich glücklich unn zufriede? Eewe nedd! Merr hodd ömmer s Gfühl, dässes die erste boor Woche noch gädd (doss iss wie a längerer Urlaub), dann owwer a bestimmter Gewöhnungseffekt eitritt unn es mit die Zufriedenheit schnell vorbei iss. „Und, Erwin?! Alles gloor?“ „No ja, s gädd. Owwer so schlecht woor s Schaffe aa nedd.“ Komisch, odder? Owwer merr wääs jo nedd, wies n jeden vo uns amoll gädd. Wichtig iss jo, däss merr sich off sein Ruhestand ausreichend gut unn rechtzeitig vuurbereit. Leichter gsocht wie gedönn! Nehm zum Beispiel n scho ältere Fußballtrainer wie n Carlo Ancelotti, der vo een Dooch of n annere vuur die Tür gsetzt würrd. Do konnst du dich goor nedd drauf vuurbereit. Annere müsse drauf gfasst sei, vo een Dooch off n annere widder off die Ärwert zu müsse! Der Jupp Heynckes zunn Beispiel. 72 Johr alt, domit unglaubliche 14 Johr älter wie der Carlo Ancelotti (wenn merr Bilder vo die zwee sidd, denkt merr, s wär römmgedreht!), iss vo die Bayern oogerufft wurrn und musst vo heut off nochert widder zumm Schaffe! Obwohl: bei Fußballtrainer und doss Geld, woss do ins Spiel iss, müsse sämtliche Vergleiche zu normale Leut wie uns zwangsläufig hink‘. Ja, die Rentner. In jedes Land senn se annersch. Woos mecht der englisch Rentner früh n ocht Uhr? Trinkt a Gloos Scotch unn gedd zuss Golfspiele. Woos mecht der französisch Rentner früh n ocht Uhr? Trinkt sein Kaffee unn gedd zu sei Freundin. Und woos mecht a deutscher Rentner früh n ocht Uhr? Mecht Frühstück, lassd Zeitung, nimmt sei Herztropfe und gedd zumm Schwoorz-Schaffe, ömm sei Rente aufzubessern. Servus, der Eustach.