So, fönnef Dooch noch, no hömmer doss aa widder unn die Bundestagswoohl iss römm. Zeit würrd’s, odder? Eine Aufreechung unn eine Wallung üüwerool! N männsde werrn sich die Boliddiger(innen) fränn, däss der Zirgus endlich widder vorbei iss. So a Wahlk(r)ampf iss schließlich fast so oostrengend wie die Schnitternt für n Bauer middn alte, glenne Mähdröscher! Und du konnst als Kandidat(in) jo nedd genuch aufgepass! Überool unn egal woss du mechst, s lauern Fettnäpflich unn Stolperfalle. Die Dorothee Bär, die ihr Gsicht off ees vo ihr Wahlplakate mit a Laabkucheherz verdeggt, obwohl sie doss jo wallich nedd notwendich hätt, die hodd doss jetzt erscht widder schmerzlich erfohrn. Medde August wor se in Euerdorf in a bekannts Modehaus zu Besuch unn in a Zeitungsannonce mit Bild unn Hinweis off ihr Roll in die Bundesregierung als Werbeträgerin zu senn. „Sie liebt Schuhe ….. und wir auch.“ woor zu lese. Sie behaupt, däss sie dovo nix gewössd hätt. Außerdem, so Bär, hätt nedd sie für doss Modehaus, sondern es Modehaus für sie gewurrwe. Wer’s gläbbt, würrd selig! Domm gelaffe, konn merr do bloß gsoch. Gscheit iss sie aus a ähnliche Situation vuur knapp a Johr anscheinend nedd wurrn. Domols hattse für die „Bild am Sonntag“ a neus Auto vo VW getest und nochher gsocht: „Ein super SUV!“ Doss hodd sich natürlich nedd off n schönne Rausch, also n Suff, bezooche, sondern off doss „Sport Utility Vehicle“ (off Deutsch ungfähr „Sport- und Nutzfahrzeug“), woss sie test durft. Ja, merr konn als Regierungsmitglied halt nedd genug aufgepass! Und stell dir emoll vuur, die Sach mit derre Werbeanzeige vo Euerdorf mecht Schul! A Rasierapparat-Hersteller wirbt mit Bild fürrn AfDler Björn Höcke unn schreibt: „Er liebt Braun ….. und wir auch.“. Odder a Hersteller vo Bohnerwochs schalt a Annonce midds Konterfei von Martin Schulz unn schreibt: „Er liebt Platten ….. und wir auch“. Und schließlich die naheliegendst Werbung im selwe Zusammenhang: A Großmetzgerei nimmt a Foto vonn beliebte wie beleibte Kanzleramtsminister Altmaier unn klatscht die Üüwerschrift „Er liebt Schnitzel ….. und wir auch.“ drüü. Ich jedenfalls bin froh, wenn doss ganz Werk vorbei iss. Owwer nedd lang: in a Johr würrd bei uns in Bayern scho widder gewählt! Servus, der Eustach.