FREDI BREUNIG

Fredis Glosse

Fränggische Bilooden (Mundart)

05.09.2017
So, 5. September, so langsam owwer sicher döffe merr uns drauf eistell, däss die Ferien- unn Urlaubszeit widder römm iss. Ja, aach die Kinner unn vor allem die Lehrer. Wie hodd der Gotthold neulich gsocht: „S gidd zwee gewichtige Gründ, Lehrer zu werrn: August unn September!“ Do iss woss droo. Owwer es sei ihne gegönnt. Der Urlaub! S ganz Johr fräät merr sich drauf und bis merr sich versidd, isser scho widder römm. Mei Fraa unn ich, mir hömm uns heuer aach amoll woss gegönnt. Mir senn gflooche! Mallorga! Prima! Doss iss annersch wie mit Gäss geackert! Früher, johrelang nerr bloß Bayerischer Wald. Ömmer s gleich Durf, ömmer die gleich Pension, ömmer mit die selb Fraa. N Oofang woor aach der Gotthold mit seine dabei. Und woos hömm mir für Strääch gemocht! S erscht Johr iss der Gotthold rückwärts mit sei Auto n Großen Arber nauf gforrn. Rückwärts, der Maulaff! Oowe hömm alle gfräächt, worömm er rückwärts rauf gforrn iss. „Der Wirt hodd gsocht, merr könnt hoowe nedd gewend‘.“ wor sei Antwort. Er iss dann owwer aach widder rückwärts noo gforrn. „Worömm denn doss?!“ hobb ich gfräächt. „Der Wirt hadd gelooche. Merr kannt oowe doch gedreh‘.“ So blöd wor der. Doss gidds beis Fliege halt nedd. Lauter gscheite Leut! Der Pilot, die Bedienunge, alles vom Feinsten. Und gereed könne die! Der Pilot hodd sich vuurn Rückflug üüwern Lautsprecher gemeldt. Hochdeutsch vom Allerfeinsten, Bruder! „ Guten Tag, meine Damen und Herren. Mein Name ist Wolfgang Hansen und ich bin heute ihr Kapitän auf dem Flug nach Frankfurt.“ Sofort hodd mer gemerkt, däss die Leut beruhigt worrn, weil se gedocht hömm: Er konn gut geredt, do konn er sicher aach gut gfliech. Du döffst als Pilot vo a Flugzeuch goornedd annersch red. Stell dir amoll vüür, a Pilot meld sich unn seecht: „So, Grüß Gott, do iss der Rudolf. Ich bin heut euer Bilood offn Waach nooch Frankfurt. Ich hobb die Streck jetzt scho hunnertmoll browiert, eemol muss‘ doch klapp!!!“ Do könnste die Leut in doss Flugzeug amoll gseh! „Ein fränkischer Pilot! Oh Gott!!?“ Die fränkische Biloode wärrn jo wohrscheinlich aach die, die onnderwaachs vergesse, n Lautsprecher auszuschalte. So a hallwe Stonn vuur die Landung hörrn hunnert Leut no: „Rudolf, noch a Bier?“ Und der Rudolf: „Nix, fertig jetzt. Ich hobb mei Auto oon Flughafen stenn und muss noch hemm fohr!“ Servus, der Eustach.

<< zurück