Neulich woor ich mit mei Fraa widder amoll off a Hochzich eigeloode. Und hobb schnell festgstellt, däss sich im Vergleich zu früher scho vill geändert hodd. Erschtens kannde merr früh schö ausgschloff, weil die Kirch erscht n hallwer Zwee wor. Doss iss heutzudooch angeblich meistens so. „Kaffeehochzich“ hodd merr do früher abfällig dezu gsocht. Zwettens worrn, wie ganz früher, kee glenne Daarlerlich mit offene Zigarette off die Tisch gstanne und drettens hodd der Bräutigam rein äußerlich n überraschend gute Eindruck gemocht, wie er zu sei Kirch komme iss. Doss mooch oo die spät Oofangszeit geleeche gsei, mehr owwer sicher oo n entscheidende Punkt, der sich grundlegend geändert hodd. Früher worrn die Polteroowende noch offn Freidichoowerts, also braggdisch nerr bloß een Dooch, odder genauer gsocht, bloß a boor Stonn vuur die kirchlich Trauung. Im Nochhinein verantwortungslos und 99% aller Ehen, die onnder die Ömständ gschlosse wurrn senn, ghörn rückwirkend heut noch annuliert. Worömm? Weil 99% vo die Bräutigamer bei die kirchlich Trauung unzurechnungsfähig worrn! Polteroowend n Freidichoowerts! Do bist du als Bräutigam so n halwer fönnef/fönnef stockvoll besoffe hemmgetrooche und n neu Uhr unsanftst scho widder geweggt wurrn. Merr hodd dich nei’n schworrze Oozuch gsteggt, du bist vuur a größ weiß Haus mit n hoche Turm gezerrt wurrn und so geeche viertel zwöllef hodd dich a weiß unn feierlich gekleideter Herr, den du scho emoll gsenn hast, unvermittelt gfräächt, ob du das hier anwesende, neben dir stehende Wesen als Fraa nahm wissd. Bist du richtig gschnallt hossd, ömm woos es ächendlich gädd, iss dir scho seitlich mehrfoch aus die erschte Bänk zugezöscht wurrn „Sooch endlich „Ja“!“ und es woor gschänn. Gfalle hodd merr, däss sich der Brauch, wo sich spätoowerts die Braut mit ihrn Strauß hiestellt und die Blömmlich no rückwärts in Richtung der versammelten Jungfernschaft (ha, ha, ha!) würfft, bis heut ghalte hodd. Wer den Strauß fängt, heiert als nächstes, so der (Aber-) Glaube. A Woche später woor ich off a Beerdigung, hadd aach a Sträußle dabei und hobb merr gedocht: jetzt mechste aach emoll n Spaß! Und hobb mei Sträußle rückwärts Richtung Trauergemeinde gschmesse. Hädd ich nedd mach söll. Die alt Klothilde hodd mein Strauß aufgfange. Wenn Blicke töten könnten …….. Servus, der Eustach.