Mensch, wie die Zeit vergädd! Alles iss so schnelllebig wurrn, däss merr Müh hodd, bei doss ganz modern Zeuch üüwerhaupt noch mitzukomme. Vo die moderne „Smartphones“ unn alles woss merr domit gemach konn (angeblich sogoor telefonier!) goor nedd zu rede. „Fatzebogg“ odder off Neudeutsch „Facebook“ zum Beispiel. Do fotografiert jemand n Mittwoch-Vuurmiddoch n hallwer Ellef a boor Weißwürscht, die er frühstückt und een Dooch später kommentieret a annerer „Mahlzeit“ odder „Lass dir’s schmecken“. Müsst merr gleich zurück schreib: „Dankschön, owwer jetzt bin ich fertig.“ Ein Schmarrn! Aach irchendwo überflüssig: Klodeggel mit Absenkautomatik. Ich muss nochts monnichmoll scho widder drauf, do iss der Deggel voss letzmoll noch goor nedd zu! Odder die moderne Autoschlössel, die merr nix merr neis Zündschloss stegg muss. Früher woor er aufgerämmd. Jetzt wässde beis Forrn nedd, wo hie mit unn wenn da ookomme bist, süchstn. Owwer jetzt gädds jo ball oos Eigemocht. Die Grüne in Deutschland welle Auto mit Verbrennungsmotor ab 2030, die Engländer ab 2040 verbiet. Kinner, die dann off die Welt komme, werrn Ausdrück wie Vergaser, Zündkerze, Auspuff usw. nie in ihr Laawe hörrn! Tankstelle gidds dann aach nix merr, weil die Elektroauto üüwerool und meistens dehemm aufgeloode wärrn. Wo bittschön sölle merr dann n Sonndich, wenn die Gschäfte zu senn, unner Chips und s Bier käff? Iss owwer jo eh nedd gsonnd und würrd bis dürthie wohrscheinlich aach verboode. Obwohl: es gädd jo weiter! Menschliche Organe konn merr bis dohie gentechnisch reparier unn manipulier. Und dann würrds richtig gfährlich. Die Leber iss dann so verändert, däss du Bier unn Schnaps ohne Ende gsauf konnst. Woss doss kosst! Du höggst offs Oktoberfest, säufst dei zwöllefts Moß Bier (kosst dann 15,70 Euro, mecht mit Trinkgeld 192 Euro!), würrschd owwer nedd besoffe! S Herz: würrd so verändert, däss du, wenn die Bee mit mache, mit Karacho n Kreuzberg naufgfohr konnst, ohne groß zu schnaufe. E-Bikes könne dann widder obgschafft weer! Ins Klössder dann ocht Mooß Kreuzbergbier und nüchtern (siehe oben) widder hemm. Und fast üüwerool, woos ömm neus Zeuch und Erfindunge gädd, stegge Männer dehinner. Wie hodd die Senta Berger amoll so schöö und treffend gsocht: „Die Männer haben keine Geduld. Deswegen haben sie ja den Reißverschluss erfunden.“ Servus, der Eustach.