Monnichmol passierts, däss merr woss gschenkt gricht, unn im Nochhinein denkt: Hätt ich doss Dromm nie gsenn! Vuur etliche Johrrn hobb ich offn Sonndichfrüh mit mein glenne Neffe a Vogelausstellung besüchd. Es goob aach a Verlosung und mir hömm mitgemochd. Und oh Wunder: mir hömm gewonne! N Vogelkäfig. Als merrn eilöös wollte, woor die Frääd noch grösser: s woor a Vogelkäfig – mit Vogel! N Wellesittich. Wie merr hemmgfohrn senn, woor mei Neffle also stolzer Besitzer vo n Voogel. Und sei Leut dezu. Die Mutter woor nedd grod begeistert und hodd mirs lang noogedroche, däss iich als der Onkel vo ihrn Buu defür gsurcht hobb, däss sie off eemol n Voochel hadde. So odder so ähnlich müsse sich alleweil die betroffene Rhöner fühl, die vo die Bayerisch Staatsregierung n Nationalpark gschenkt griech sölle. Als Beobachter vo die ganze Diskussione unn Aufreechung höchst erstaunlich, wie merr als gut 300 km entfernte Regierung ohne Not so viel Streit unn Spaltung in a oo sich ganz ruhige und friedliche Geechend gebreng konn. Die Frooch iss nur, ob doss die Staatsregierung so freiwillig vonn Zaun gebroche hodd, odder doch mehr dehinner steckt. Der Flughafen in München söll irchendwenn a drette Startbahn griech und oos Riedberger Horn söll a umstrittene Skischaukel gebaut wäär. Alle zwee Maßnahmen senn heftige Eigriff in die Natur und müsse wo annersch ausgegleche weer. Merr well also oon Münchner Flughafen a boor hunnert Hektar Feld unn Wiese für die drett Startbahn zubetonier und doo defür in die Rhön (odder in Spessart odder süssd wo) 10.000 Hektar Nationalpark schaff. Owwer wäär doss wallich a Ausgleich? Die Natur hodd doch bei uns eh scho ihr Ruh. Doss wär jo im üüwerdroochene Sinn braggdisch so, wenn du een, der sowieso scho blooß Radler säuft, vuurschreibst, däss er a jetzt bloß noch alkoholfreis Radler trink döff. Also weenicher wie nix! Nedd eefoch doss alles. Ich bin selwer hie und hergeresse und koo nur empfehl, däss merr sich aktiv informiert, weiterhie alle Pros unn Contras oohört unn möglichst sachlich diskutiert. Annererseits müsst merr scho allee dasswaache pro Nationalpark sei, ömm später, in a boor Joohr, seeh zu könne, obb wallich alles so komme iss, wies die Bolidigger jetzt verspreche. Wenn der NP 3 nedd künnt, werrn merr doss nie erfohrn. Owwer er würrd jo eh komme, der Park. Fräächd sich bloß, wo. Servus, der Eustach.