Und? Pfingste guut römmgebrochd unn vonn Heilige Geist erleucht wurrn? Wenn doss jetzt so monche Junge laase, werrn se denke: „Heiliger Geist? Woss söllen doss sei???“ Ja, zur Zeit gidds, wie jedes Johr in derre Johreszeit, jede Menge Feierdeech. Nur wösse scho vill nix merr, worömm so moncher Dooch üüwerhaupt frei iss! Christi Himmelfohrt würrd jo scho oft goor nix merr so bezeichnet, sondern hässd „Vodderdooch“. Do wösse die Junge, egal ob scho Vodder odder nedd, gleich woss los iss. Unn haue entsprechend nei. Es iss zu befürchte, däss irchendwenn in ferner Zukunft die Gewerkschoffde mit ins Spiel komme unn entschiede würrd, däss die kirchliche Feierdeech mangels Kenntnis in die Bevölkerung üüwer ihr Bedeutung, ihrn Sinn unn ihrn Zweck, eefoch in Urlaub bzw. arbeitsfreie Deech ömmgewandelt werrn. Schlimm, odder? Fronleichnam, Mariä Himmelfohrt – kirchliche Feierdeech, die natürlich dankend oogenomme werrn, vo denne owwer vill scho nix merr wösse, woss für Bedeutung sie hömm. Sie werrn aach nedd als solche begange. Merr hod halt eefoch frei und frääd sich. Jeder well nur noch nemm, nemm und noch emoll nemm, owwer nix merr geb. Blutspende zum Beispiel. Neulich hobb ich n Schrieb vonn Blutspendedienst gricht: „Wir möchten Sie darüber informieren, dass es künftig in Strahlungen und Burglauer keine Blutspendetermine mehr geben wird.“ Grund: „Sinkende Teilnehmerzahlen.“ Dafür iss in Strahlunge bein Kellermann a neuer Biergorrde eröffnet wurrn. In sich nei saufe die Leut also anscheinend ömmer mehr, owwer her geb dunn se nix merr! Bin ich jetzt vielleicht zu kritisch, pessimistisch unn rückständig? Ich wääs nedd. S fällt merr halt auf. Die Sitten verfalle zunehmend. Beispiel Fußball-Relegationsspiele: Platzsturm unn Randale, wenn die ääche Mannschoffd verliert, wie zuletzt in Braunschweig unn München bei die Löwen. Die annere, die vonn FC Bayern, baue bei‘s letzt Spiel glenne Kameras off die Weizengläser, ömm domit zu filme, wie a Riesengloos Weizen off Trainer odder Mitspieler gekippt würrd. Gädds noch blöder? Doss wenn ich scho ömmer seh mit derre „Weißbierduschen“! Frechheit! Trotzdem in der Beziehung, nooch so viel Jommern, zunn Schluss noch woss lustigs. Deutsch iss scho a schwerre Sprooch. Doochsüüwer hässts: „Der Weizen, das Korn.“ Und oowerts: „Das Weizen, der Korn.“ Servus, der Eustach.