Vier Mooned lang hodd merr unner Hünner jetzt gebloochd unn eigsperrt, bevuurs vuur uungfähr eenahalb Woche endlich soweit woor: die vermaledeit Stallpflicht, die Mitte November voss vergange Johr weeche die Vogelgrippe verhängt wurrn woor, iss endlich widder aufghoowe wurrn und die Hünner hömm widder hie gedöfft, wo se hieghörn und wo se n liebste senn: naus!!! Doss hodd n Gotthold und mir jo fast s Herz gebroche: jeden Dooch zuzugugge, wie unner Hünner leide wie a Hund und dinn blei musste. Weihnochte, Neujohr, Dreikönig, Fasching: keine Gnade! Selbst bei 20 Grad unn schönsts Frühlingswadder, kee Ausnohm! Owwer jetzt isses jo endlich widder vorbei. Die Stallpflicht iss aufghoowe und s gidd widder jede Menge glüggliche Hünner! Freiland- statt Käfighaltung! Gidds bei uns Mensche üübrigens aach. S existiern tatsächlich Regione in Deutschland, wo die Kinnergorrdeplätz (Kitaplätz genauer) nix merr lange und für n Neubau kee Geld doo iss. Und woss mecht merr? Aus die Not a Tugend und scheggt die Kinner wie weiland Hänsel unn Gretel naus nein Wald! Der neueste Clou: Waldkinnergärte! Bei Wind unn Wadder senn die Glenne daus unn ärchern inn Wald statt dinn in a worms Haus ihr Erzieherinne. Freiland- statt Käfighaltung! Und doss grod jetzt, wo der Wolf in unner Geechend widder heimisch würrd. Rotkäppchen! Wor alles scho mo doo! So wie die Drohne, die uns jetzt als Riesenfortschritt verkäfft werrn. Wos mecht a Drohne? Fliegt durch die Luft und brengt zukünftig die Post? Hömm früher die Brieftaube gemocht! Odder eewe nedd?! Ich sooch jo: wor alles scho mo doo! Noch emoll zurück zu die Hünner. Woss mir Amateur-Züchter nedd gewössd hömm, iss die Tatsach, dässes aach bei die Hünner im wahrsten Sinn des Wortes a gewisse Hackordnung gidd. Merr hodd ranghöhere unn rangniedere Hünner. So lang die daus senn, iss doss kee Problem, weils jede Menge Platz gidd und merr sich ausweich koo. Owwer dinn konnte in die Endphase vo die Stallpflicht die rangniedere Hünner denne ranghöhere nix merr ausgeweich und senn gebloochd wurrn. So ähnlich, hobb ich mir doo gedocht, musses so monchen Moo geh, der nooch fuchzig Johr in die Fabrik endlich in Rente gedd und dann dehemm feststellt, däss er dem ranghöheren Wesen nix merr so richtig ausgeweich konn unn dann gebloochd würrd …….. Servus, der Eustach.