Merr staunt doch ömmer widder, wie schnell die Zeit vergedd. Ereignisse, wo merr denkt, die worrn erscht, lieche scho widder weit zurügg. Die Grenzöffnung vuur 25 Johr, die Einführung vo die neue Postleitzohle vuur 22 Johr odder die Euro-Einführung vuur guut 13 Johr, nur ömm amoll a boor ganz bekannte Beispiele zu nenne. Aach wenn Dinge erscht a Johr zurügg lieche, hodd merr s Gfühl, doss woor erscht und staunt, däss doss scho widder so lang her sei söll. Murrn, n 8. Juli, genau vuur a Johr, woor woss, wo sich garantiert vill noch genau droo derinner könne. No, wer wääses? Ja, genau! 8. Juli 2014, Fußball-Weltmeisterschaft, Halbfinale Brasilien - Deutschland. Wie hömm mir alle vuur doss Spiel geglabbert und gedocht: Oh je, geeche Brasilien, in Brasilien, doss würrd doch nix! Ich wääs noch genau, wie doss woor. S woor a Diesdich wie heut und ich musst n nächste Dooch n hallwer sechs früh raus. S Spiel in Brasilien woor erscht n zääh Uhr oowerts und ich hobb lang üüwerleecht, ob ich‘s dehemm gugg odder nei die Wirtschoffd geh. Hobb mich dann doch für die Wirtschoffd entschiede (wunnerts ees?), weil der Gotthold gsocht hodd, däss er aach nei gädd. Der Wirt hadd sich zur Feier des Tages woss ganz besondersch eilässfall und stolz verkündt, däss er für jedes deutsche Tor geeche die Brasilianer a Freibier spendiert. „Geizgrooche!“, hobb ich noch gedocht. „Grood geeche Brasilien, woos eh nedd vill zu erbe gidd. Doo hodd er leicht reede!“ Owwer gut, vill trink wollt ich sowieso nedd. Musst jo früh raus. Hobb mir n Platz gsücht, und noch bei mir gedocht: No ja, doss ee Bier würrschde nei grieche. Ee Bedingung hodd der Wirt für sei Großzügigkeit noch gstellt: s gääb ömmer nur a neus Freibier, wenn’s alt leer iss. Kee Brobleem geeche Brasilien, odder? No gings los. 1:0 Müller, 11. Minudde. Subber! Lieber jetzt s Freibier als in die 88. Minudde und s würrd a Pressbier. 23. Minudde, Klose, 2:0. Do musst ich scho schlugg, owwer s ging. Und dann! 24. Min. 3:0, 26. Min. 4:0, 29. Min. 5:0!!! Vier Tore in siewe Minudde! Zwee devo hobb ich nedd gsenn, weil ich grood beim Leertrinke voss Freibier vuurher wor! Ich hobb ball gegöggt! Fürs föfft Bier hatt ich dann mit die Halbzeit a hallwe Stonn Zeit. No koom der Blödel vo Schürrle. 69. Min. 6:0, 79. Min. 7:0. Siewe Bier in eenahalb Stonn. Kee Wunner, wenn merr Dooch wie n 8. Juli 2014 nedd so schnell vergesst. Servus, der Eustach.