Scho verröggt alleweil. Kaum hodd sich der ee Sturm geleecht, braust der nächst auf. Erscht doss Drama mit die FIFA und n Blatters Sepp, jetzt der G7-Gipfel off Schloss Elmau. Komisch, däss vill, woss a Brobleem iss und heftig diskutiert würrd, mit a "G" bezeichend würrd. G3, G6, G7, G8, G9, G36, G zu, G weiter! Und natürlich "Eff" wie "FIFA". So ein Zirrgus! Do lässt doch der Blatters Depp, äh Sepp (Tschuldigung) daadsächlich Delegierte aus 209 Mitgliedsverbänd ooreis, sich wähl, ömm dann vier Dooch später zu sooche, däss er sichs annersch üüwerleecht hodd und widder zurügg dredd. Größenwahn! Fußball im Großen und Fußball im Kleinen. Vergleich amoll die mächtig FIFA mit unnern schnuggeliche Fußball-Kreis Rhön und die Fußball-WM mit die Relegationsspiele, die jetzt worrn. Werrn jo aach vergeewe wie a Fußball-WM und bereite demjeeniche Verein, der so a Spiel gricht, nedd unerhebliche Einnohme (Bier, Broodwürscht etc.). Owwer der Kreisspielleiter (der Ritter's Michel vo Kissinge, vergleichboor mitt'n Blatters Sepp vo Zürich) konn nedd geworrd, bis die Millione aus Russland odder Katar komme, ömm dann zu "entscheide", wo gspielt würrd, nee, er muss streng nooch geografische Gsichtspunkte entscheid, wo er spiel lässt. Gugge merr uns die wichtigste Spiele amoll oo. Niederlauer - Rottershause woor in Reicheboch, hädd streng geografisch (genau in die Medd) owwer offn Schindberg müss sei, irgendwo doo, wo jetzt die ville Windräder stenn. Bischofsheim - Schondra hädd statt in Wildflecke in Oberbach müss sei, bei Eibstadt - Waldberg (in die Neuscht) und Sulzdorf - Frickehause/MET (in Ächehause) hodds ganz gut gebasst. Dann owwer der Hammer und das Spiel der Spiele n vergangene Sonndich, Waldberg - Bischofsheim. Die ganz Rhöner Fußballwelt hodd sehnsüchtig drauf geworrd, däss der Ritters Michel vuur die Kameras dredd, s Kuvert aufmecht, n Zettel rausziecht unn den Spielort, streng nooch geografische Gsichtspunkte ausgewählt, feierlich vuurlasst: "Kreuzberg, Klosterwiese". Owwer wo hie hodd merr doss Spiel vergaawe? Nooch Wollbich, zu die Saandhoose! Wollbich - Katar der Rhön! Wüstendorf mit Saand ohne Ende! Doss iss also s Kriterium, der Saand! S seiere gegönnt. Zum Schluß a schönner vo hunnerde Blatter-Sprüch, die's jetzt gidd: "Der Sepp Blatter hodd als Kind Sandburge gebaut. Heute seecht merr Pyramide dezu." Servus, der Eustach.