Heut, n 31. März, iss widder eeno vo die ville verschiedene Stichdooch, die's im Johr gidd. Der Dooch, wo in die meiste Firmen die letzt Möglichkeit dafür bestedd, den berühmt-berüchtigte "alte" Urlaub zu nehme, bevuur er murrn gnadenlos verfall dääd. Noch vuur a boor Johr woor doss kee Brobleem. Entweder merr hadd bloß 24 Dooch Urlaub im Johr und hodd die logger bis 31. März voss Johr drauf wagg gricht. Odder die Firmen hömms nedd ganz so eng gsenn wie heut und alte Urlaub aach noch gewährt, wenn's scho fast naus Drösche gange iss. Neujohr konn merr jo schließlich aach bis zu die Hoowerernt gewünsch. Aus und vorbei. Heut hömm die meiste Arbeitnehmer stolze 30 Dooch Urlaub und dunn sich schwer mit, die in ee Johr wagg zu brenge. So bleibe ömmer noch a boor ennzelne Dooch übrig. Weil in die erschte drei Mooned vo a Johr oft n Haufe Ärwed doo iss, verschiebt merr s Nahme von Resturlaub ömmer widder, bevuur dann so zwee, drei Woche vuur n 31. März a reechelrecht Torschlußpanik eisetzt. Kurz vuurher künnt no oft noch a Rundschreiben voss Personalbüro, woo dinn städd, däss noch ee enzelner Dooch alter Urlaub übrig iss. Hektisch würrd nooch a Lösung gsücht und der vermaledeit letzt alt Urlaubsdooch für genau 31. März eingebloond. Fast scho vergleichboor midds Käffe vo die Weihnochtsgschenke n 24. Dezember. Merr gedd als Moo hemm, seechts der Fraaa und die hodd gleich Blöön, wie der Dooch möglichst sinnvoll genützt wäär könnt. "S Laab vonn Herrwest ghört zommgerecht, die Hecke muss gschniede wäär und ächentlich könnte merr aa die Köche tabbezier, wenn du dehemm bist!" Jetzt wirkt bein Moo s berühmt Gsetz von Lust und Unlust. Er wägt obb, vergleicht die zwee Dooch mitannener und künnt zum Schluß, dässes jo ächentlich gor nedd so schlimm iss, off die Ärwed zu genn. N 29. März marschiert er ins Personalbüro und verkünnt stolz, däss er großzügig zum Wohle der Firma off sein letzte Doch alter Urlaub verzicht. Er muss dann zwor schaff, hodd owwer n Haufe Ärwed gschboord. Scho komisch, odder? Noch n schönne Witz zum Schluß? Geht eener zuss Finanzamt und fräächt: "Wann kann ich Urlaub nehmen?" Sooche die dürrt voss Amt: "Ja, aber das geht doch nicht. Sie sind doch gar nicht hier beschäftigt!" "Weiß ich." seecht derjenich. "Aber ich arbeite ja fast nur für Sie!" Servus, der Eustach.