Ich muss zugeb, däss ich a begeisterter Radiohörer bin. Früh noochs Aufstänn mach ich die Kiste oo, unn oowerts, erst kurz bevuur ich neis Bett geh, künntse widder aus. Und so gädd doss Gedüüdel den ganze Dooch. Und woss für feine Antenne merr zwöschezeitlich für Meldunge entwiggeld hodd, die aus unner Geechend komme, doss iss höchst erstaunlich. Verkehrsmeldunge zum Beispiel. Früher, wie mir unner A71 noch nedd hatte, hossde drüü wagg ghört. Ob jetzt zwösche Allershausen unn Pfaffenhofen a Stau wor, bei Greding a LKW ömmgschmesse hadd, odder zwösche Frasdorf unn Bernau Fahrzeugteile off die Fahrbahn gelaache worrn, wor een sowoss vo wurscht egal. Owwer jetzt, wo die A71, unner Autoboh, doo iss, off Bayern 3 odder Antenne Bayern direkt oogsproche würrd und aa noch dezu vo die Anschlussstelle Bad Neustadt odder Mellrichstadt die Red iss, do bist du sofort online, aufgereecht unn hörst genau hie. Schließlich hodd mer jo Verantwortung für sei Region! Merr konkurriert jetzt mit so weltbekannte Anschlussstelle wie die Holledau, Allersberg, Hiltpoltstein, Tennenlohe odder s Inntal-Dreieck, spielt in doss Konzert vo die Grösse midd unn do konn eehn sowoss nixmerr gleich gsei! Endlich! Und merr denkt: hoffentlich iss zwösche Neuscht unn Mellerscht woss Gscheits bassiert unn mir blamiern uns nedd. Ganz Süddeutschland hört zu! Wenn zum Beispiel bei Röddlmerr a Bulldog a Ackerschiene off die Autoboh verlurrn hädd odder n die Näh vo Bahra Hammel off die Autoboh römmlaff dääde, woss wär doss für eine Blamaasch für uns! Odder der Gau: „Zwischen Bad Neustadt und Mellrichstadt liegt ein toter Fuchs und kurz danach ein toter Hase auf der Fahrbahn.“ Do wääs doch jeder, woss los woor: der Fuchs wollt n Hoos Gut Nocht sooch unn do debei senn se üüwerforrn wurrn. Bessenbach-Waldaschaff, Randersacker, Schlüsselfeld, Hofoldinger Forst, Irschenberg – all die Gröößen in Sachen Verkehrsmeldunge dääde hämisch üüwer uns lach. Owwer a Schwertransport zwösche Müürscht unn Mossbich, der nedd üüwerholt wär konn, a Mega-Stau in die Näh vo die „Mellrichstädter Höhe“ odder s berühmt „Brennende Fahrzeug“ off die Saaletalbrögge bei Hollscht – doss senn Meldunge, doo gädd een s Herz auf. Passier söll dabei ömm Gottes Wille nix – owwer woss Gscheids sölls no scho sei, wenn mir scho amoll ins Radio komme, odder?

Servus, der Eustach.