So! Faschings-Diesdich. Ball hömmersch widder. Während die Foosenocht für Frühaufsteher ömmerhie noch ochtze Stonn dauert, isses für die, die nachde oowerts noch offn Roosemonndichs-Daanz worrn und lang gschloffe hömm, in zwöllef Stonn scho römm. Ächentlich g‘hörn wie die berühmte Wirtschaftsweise („Sachverständigenrat zur Begutachtung der gesamtwirtschaftlichen Entwicklung in Deutschland“) so genannte „Foosenochtsweise“ beruffe („Sachverständigenrat zur Begutachtung der gesamtfastnachtlichen Entwicklung in Franken“). Die müsse dann jeweils nooch die Foosenocht Bilanz zieh und uns Norre erklär, wie’s ömm die Foosenocht städd. Ich prowiers amoll. Daadsach iss: S gidd fast kee Durf - und wenns bloß hunnert Einwohner hodd - woos mittlerweil nedd n Kappeoowerts, a Büttensitzung odder goor a Prunksitzung gidd. Die Hochburgen hömm domit langsam Brobleeme, ihr Sitzunge vool zu grieche und die Korrde los zu werrn. Hässd owwer keinesfalls, däss s Foosenochtsfeiern nooch lässt. Ganz im Geechedääl! Die Foosenocht buumd! Wunnert mich nedd, weil ich soochs scho ömmer: alles woss midd Esses und Drinkes (odder besser „Fresses und Saufes“?) zu dunn hodd, funktioniert. Foosenocht, Kirmes, Bietsch-Bardies, Marktplatzsommer, Oktoberfeste - egal wo - wenns mit Sauferei zu dunn hodd, iss jede Tradition mit die junge Leut brobleemlos aufrecht zu erhalte. Owwer wehe, sie sölle widder amoll nei die Kirch! Do sissde keen! Owwer halt! Vesperkirch in Schweiffert! Hobbd ihrs gelassd? A Middochesse, Kaffee und Kuche für een Euro fuchzich, in die Kirch! Ergebnis: 10.000 Gäst in zweeazwanzig Dooch. 450 jeden Dooch! Bei uns gidds mittlerweil Kirche, die brauche für so viel Leut logger zeeh Sonndich! Ja, ja. Aach die Kirch muss neue Weeche geh, ömm ihr Schäflich (odder söllt merr „Hammel“ sooch?) oozulogge. Owwer gut. Jetzt gädd erscht amoll die Fastenzeit los und alles gädd a weng ruhiger. Wallich? Murrn früh. Zeeh Uhr. Boliddischer Öschermittwoch vo die CSU in Passau. Essen satt, Bier in Maßen, Leut in Massen! Ich soochs jo: alles woss midd Esses und Trinkes zu tun hodd, funktioniert. Drömm staun ich ömmer widder, worömm die Kirch oowe n Kreuzberg ömmer vool iss. Obwohls do dinn jo nix zu Esse und zu Trinke gidd …………. HELAU, der Eustach.