„Merr konn heutzudooch keen merr getrau!“ Doss iss nedd der verweifelt Ausruf vo n Pforr, der drüü jommert, dess keener mer heiert, naa, doss iss scho so gemeent, dess merr in die heutig Zeit grundsätzlich alles oozweifel muss, woss een so begeechend. Im wohrste Sinn voss Wurrd! Überleech amoll, wieviel annere Auto dir als Autofohrer jeden Dooch off a Landströss entgeecha komme und du bei jeden ennzelne drauf hoff musst, däss er wallich off sei Seite bleid. Irchendwie hodd der Mensch a gewisses Urvertrauen in sich, ohne doss s ganz Laawe nedd funktionier dääd. Stell dir amoll vur, du fohrest mit dei Auto off a Brögge und könnst dir nedd sicher gsei, däss die aach wallich hält! Wer steigt denn vuurher aus und prowiert wie beis Schlittschuhfohrrn offn zugfrurrne See aus, obbs tatsächlich dreecht?! Oder oo n beschrankte Bahnübergang. Wer guggt denn, wenn die Ampel aus und die Schranke hoch gedd, zur Sicherheit noch amoll nooch rechts und links, obb nedd doch noch a Zug künnt? Jeder rommbelt mit sei Kiste los und verlässt sich drauf, däss die Technik funktioniert. Mei Enkele hodd mich neulich beis Worrde oo soon Bahnübergang gfräächt, woss bassier dääd, wenn jetzt der Strom wagg wär unn die Ampel gääh dääd. Der Zug, der mit Diesel föhrt, künnt – aach wenn kee Strom doo iss! Ich konnts nedd beantwurrd. Owwer irchendwie muss merr sich halt off Zeuch verläss könn, woss versproche und als selbstverständlich vurauszusetze iss. Nedd wie der Ami, der jetzt geeche die Red Bull Limonad vuur Gericht gange iss, weil er scho Tausende Doose vo die östreichisch Brüh getrunke hodd und ihm ömmer noch kee Flügel gewochse senn! Und es Schönst: er hodd recht gricht und die „Roten Bullen“ hömm vuursichtshalber sage und schreibe 13 Mio. Dollar Strafgeld hiegeblättert! Amerika – das Land der unbegrenzten Möglichkeiten! Konn alles, wääs alles, hodd alles. Sogor Kugelschreiber, die im Weltall funktioniern. Hobb ich jetzt gelassd. Scho in die 1960er Johrrn, wies mit die Raumfahrt so richtig losgange iss, hodd die NASA in a groß oogeleechts Forschungsprojekt für Millionen vo Dollar tatsächlich n Kugelschreiber entwickelt, der aach in die Schwerelosigkeit gschriewe hodd. Do worrn die Russe natürlich aufgschreckt und hömm verzweifelt üüwerleecht, woss sie mach sölle. Und zum Schreiwe im Weltall  - n Bleistift genomme!!! Servus, der Eustach.