Ich mach‘ jo ömmer gern früher im Johr scho amoll n glenne Jahresrüggbligg, owwer heut, oo Silvester, doo iss doss jo wohl erlaubt und doo gidds heut woss ganz Besondres. Mei diesjährige Auszeichnunge: Idee, Sensation unn Vollpfosten (die Heute-Show lässt grüßen) des Jahres! Alle drei erscht aus die letzte zwee Mooned. Los gedds mit der „Idee des Jahres“, die’s n 4. Dezember – wen wunnerts – vo der Deutschen Bahn geewe hodd. Die wollt die gelbe Aushäng mit die Abfahrtszeite vo ihr Züüch zwoor in die Bohhöf häng läss, die weiße Aushäng mit die Ankunftszeite owwer obschaff. Geniale Idee! Wenn keener mer wääs, wenn a Zug ookomm söll, konn sich aa keener mer über a Verspätung beschwer! Hömm se dann owwer doch nedd gemocht. Kategorie 2: die „Sensation des Jahres“. Gabs n 13. Dezember: die komplett saniert BayWa-Kreuzung woor fertig unn widder frei befohrbor! Owwer nedd nur doss. Fast gleichzeitig wor die Hööschter Brögge widder frei, kurz vuurher die Orsdurchfahrt Saal unn - nooch zweeahalb Johr - die Ortsdurchfahrt Stetten. Sensationell! Unn am Böschungsrutsch bei Rödelmaier konnt mer aa widder in alle zwee Richtunge vorbeigfohr. Woss ich mich frääch? Woos mache mer alle mit unner vill Zeit, wenn aa noch der Kreisel in Grösseborderf fertig iss (unn die Statue von Josef Demar in die Medd droff städd) und Friggehause – Mellerscht fertig iss? Langweil‘ werrn merr hömm! Soo, unn jetzt zum ultimative Höhebungd: mei „Vollpfosten des Jahres“! Senn segoor zwee: Donald Musk unn Elon Trump. Odder annerschrömm. Egal! Der Donald iss am 5. November widder zum US-Präsidente gewählt wurrn – unn hodd sich n Musk, Tesla-Gründer unn -Besitzer, inn sei Berater-Team gholt. A guter Grund für mich, mir nie n Tesla zu käffe! Nie! Außer, unn doo könnt ich dann tatsächlich schwoch gewär: a Tesla dääd irchendwenn amol soo sicher autonom unn automatisch fohr, däss mer aa noch mit drei odder vier Bier hemm fohr döffed. Owwer ob doss - aa wenns funktionier dääd - so gut wär? Ich wääses nedd. Bei a Fest in a Bierzelt mit zum Beispiel 800 Leut, wo heut dank Promillgrenz ca. 25 % unn domit 200 Leut einigermaßen nüchtern senn, wärrn dann alle besoffe, unn doss dääd nedd lang gut geh. Also lässe mersch lieber, käffe keen Tesla unn halte uns weiterhin schö broov oo unner Promillgrenz. Ich wünsch euch n guude Rutsch! Servus, der Eustach.