Irchendwie isses ömmer schöö, wenn merr woss in die Zeitung lassd odder sidd und dann oo woss derinnert würrd, woss scho lang Vergangenheit und in die Versenkung verschwunde iss. Mir isses so gange, wie ich neulich doss Bild gsenn hobb, wo die neue Uniforme vüürgstellt wurrn senn, wie se unner Bolizei demnächst ooziech muss. Der ee Bolizist der die Kombination „dunkelbloowe Hoose, dunkelbloowe Jagge, fönnef Knöpf, bis oowe hie zugenöpft“ droo hadd, hodd ausgsenn wie a Kofferboy in die Serie „Hallo – Hotel Sacher ….. Portier!“ middn Fritz Eckhardt selig. Doss worrn noch Zeite, he? Ähnlich ausgsenn hodd owwer aach der Herr Wachtmeister ins „Königlich Bayerisch Amtsgericht“. Ihr wösst scho, gspielt von Schorsch Blädel, der ömmer gsocht hodd: „Der Zeuge Korbinian Mösenlechner. Jawoll!!!“ Und dann zum Weißwurschtesse und Biersaufe zunn Herrn Ökonomierat gange iss. Legendär! Die Kombination „bloowe Hoose, weiß Hemm, weiße Schildkappe“ sidd aus wie a Kapitän zur See und wenn ehner zukünftig oo die Foosenocht als Kapitän geh well, muss er sich nur eene vo die neue Bolizeiunifomre burch. Owwer worömm müsse mir ömmer alles nooch mach, woss die Ami vuurmache? Besagte Bolizeiuniforme, Halloween, McDonalds, Coffee to go, die Rettungswääche voss „Rot Kreuz“. Rood-weiße Säukissdlich – furchtboor! Woss worrn doss noch für Zeite, wie die Dinger traditionell a weng rundlich in a noowels beige vuur gfornn senn! Owwer s gädd jo noch weiter! Die schöö Martinshorn-Melodie, ömmer widder gern hört (für die Musiggande: die Quarte g – c = Dadüü dadaa!), söll durch die heulende Sirene ersetzt wär, wie merrsche aus die amerigganisch Kojak-Serie kennt. Nedd wunner dääds mich jo, wenn so Zeuch wie „Lebend-Schach“ (iss neulich in Könnshoofe gspielt wurrn) aach vo unner amerigganische Freund komm dääd. Die Schachfigure werrn doo durch Mensche ersetzt. Und jetzt worrd ich jo bloß drauf, dess demnächst a Kegelglubb drauf künnt, Lebend-Kegeln zu spiele (die Frooch iss, werr den Dunnerkeil ganz vurrn in die Medd mecht) odder noch schlimmer: a Schützeverein drauf künnt, sei nächst Vereinsmeisterschaft mit lewendiche Zielscheibe zu veranstalte. Ganz nooch die alt Mitgliederwerbung vo Schützevereine, die zugegebenermaßen scho n ziemlich lange Boord hodd: „Lerne Schießen, treffe Freunde!“ Servus, der Eustach.