Monnichmoll nemme die Dinge a Entwigglung, doss sössde nedd für mööchlich halt. Der NSA-Untersuchungsausschuss vo unnern Bundestag greuft jetzt doch tatsächlich widder off mechanische (!) Schreibmaschine zurügg, weil er Angst hodd, däss der Ami grod dann sei Lauscher aufstellt, wenns ömm ihn sellwer gedd. Die Händy vo die Abgeordnete senn bei die Sitzung nei a grösse Metallkiste geleecht wurrn, unn der Herr Ausschussvorsitzende hodd klassische Mussig eilässspiel, däss vo auße keener ghör kannt, woss dinn geredt wurrn iss. Unn wallich: s Gschäft midd ganz normale Schreibmaschine brommt waache NSA unn Co! Hobb ich ins Radio ghört. Und doss iss wohrscheinlich erscht der Oofang vo a Rolle rüggwärts in jeder Beziehung. Kommando zurügg! Alles woss alt unn vorbei zu senn schien, künnt widder! Schallbladdespieler, Kasettenrekorder, Fotoabberaade mit Film dinn, alte Nummernschilder oo die Auto. Beis Rechern schiewe merr wie süsst Küüchelich vo links noch rachts und die Leut reede widder mitananner, statt zu mäile, zu simmse oder „Wodds Äbb“ mitananner zu mache. Die Jugend iss midd Begeisterung dabei! Die hodd im Zeitalter, wo Mudder unn Vodder üüwer die modern Kommunigation ganz in bester NSA-Manier punktgenau wösse, woss der Noochwuchs grood so treibt und wo er steggt, woss ganz neus, alts entdeggt: S „Briefen“. Ja, wallich! Merr schreibt sich widder ganz normale Brief, wo bis off die zwee, wo sich schreiwe, außer n neugierige Postbot kee Sau wääs, woss dinn steht! Dauert alles zwor ees, zwee Dooch, bis a Noochricht ookünnt, owwer doss iss doch genau doss, woss mir scho lang widder brauche: Langsamkeit unn Entschleunigung! Und noch n Vorteil hodds „Briefen“. Du konnst dei Esse nedd wie jetzt bloß fotografier und 300 Freunde gezeich, naa, du konnsts n annere sogoor richtig gschegg! Iss doch praktisch. A woss bestellt, wo du nedd moochst und eefoch n Freund gscheggt. Mir telefoniern aach ball widder mit Telefone, wo a Schnur nei die Wand gädd und wo merr beis Obbheewe mutig sei muss, weil merr nedd schon vuurher sidd, wer droo iss. Telefonzelle werrn widder aufgebaut und wenns reend und du keen Schirm dabei hossd, wässte wenichstens widder, wo du hie konnst. Der Kinner muss doss dann alles neu erklärt wäär: „A Telefonzelle iss a Händy, wo merr nei gsteig konn.“ Servus, der Eustach.