Jetzt, woos off die Kommunalwohl zugädd, scheide demnächst aus verschiedenste Gründ aach etliche Bürchermässder aus. Ob merr jetzt so a Oberhaupt vo a Durf mit a boor Hunnerd Einwohner als Bolidigger bezeichen konn, iss die Frooch. Vom Reede her unterscheide sich solche Leut aus die Medd voss Volk oft wohltuend vo die in die gröss Bolidigg. Der Willi Schmitt vo Strohlunge zum Beispiel. Hodd vuur längerer Zeit amoll in a Bürgerversammlung off die Frooch, worömm in Strohlunge kee neus Feuerwehrhaus gebaut würrd, kurz unn knapp gsocht: „Mir hömm kee Geld!“ A Polit-Profi hädd wohrscheinlich ausgführt: „Der finanzielle Spielraum unserer Kommune lässt die Investition in eine neue Immobilie für die Gegner eines der vier Elemente leider nicht zu.“ A annersch Beispiel: Wie oft hodd merr in sei Kindheit off die Frooch oo Mudder odder Vodder, worömm merr irchendwoss nedd gricht odder döff, zur Antwort gricht: „S gädd nedd annersch!“ Schluß, aus, fertig! Heut, wenn die Bundeskanzlerin zu irchend a Entscheidung seecht, „Das ist alternativlos“, iss doss nix annersch wie „S gädd nedd annersch“, owwer sie würrd defür gezankt. Auffällig aach ömmer widder der Spruch, wenn a Steuerhinterzieher oder a Sportler, der gedopt hodd, derwöscht wurrn iss: „Ich habe einen großen Fehler gemacht, den ich zutiefst bedauere." Hässd soviel wie: „Ich hobbs probiert, bin owwer derwöscht wurrn.“ Und die Sprooch färbt oft aach off die Journaliste oo, die üüwer die gröss Bolidigg berichte. Oft hört merr doo jo die Aussooch: „Wie aus gewöhnlich gut unterrichteten Kreisen verlautete ……….“ Hässt bei uns: „In die Wirtschofft hömmse gsocht  ……….“. Oder: „Ich bitte Sie ausdrücklich darum, absolutes Stillschweigen über diese Information zu bewahren und die Quelle nicht preiszugeben!“ Bei uns: „Owwer halt bloß die Gusche unn sooch jo nedd, wo dess her hossd!“ Und genau aus dem Grund isses schö, wenns Leut wie n Willi Schmitt gidd, die nedd groß außerömm reede und kurz und knapp offn Punkt komme. Erstaunlich offe neulich aach s boliddisch Schwergewicht Siechmar Gabriel vo die SPD. Hodd in a Stern-Interview, obwohl jetzt jo sellwer midd oo die Macht, ganz ehrlich gsocht: „Belgien war fast zwei Jahre lang ohne Regierung und hat sich in dieser Zeit hervorragend entwickelt." Ob doss für uns nedd aach amoll a Modell wär? N Versuch wärsch wert. Servus, der Eustach.