FREDI BREUNIG

Fredis Glosse

Nohrungsmittel-Vernichtung! (Mundart)

29.10.2019
Wie der Gotthold, bin aach ich a begeisteter Fußball-Fan unn oft „leif“ in Aabscht, Grösseborderf odder irchendwo annersch bei uns offn Fußballplatz dabei. Bei die höchere Klasse geh ich hauptsächlich weeche n Fußball hie, in die önndere Klasse frääts mich, dässes doo s Bier noch in Flösche gidd unn nedd aus Plastikbecher getrunke wer muss. Anscheined senn die Köpf in die B-, A- odder Kreisklass hörrder wie weiter oowe unn dääde a gewurfene Bierflösche aushalt. Wenn ich Bundesliga ins Fernseh gugg, fällt mir Zeuch auf, woss mer bei näherer Bedrochdung nedd geglääb konn. Hodd middn Fußball nur oon Rand zu tun, wie ihr euch bei mir gedenk könnt. Die Dortmunder Südtribüne zum Beispiel, die berühmte „Gelbe Wand“: beste Stimmung, alles in schwarz-gelb, gigantisch, unglaublich, unwiderstehlich! Aufgfalle iss mir, dässes bei n Torjubel in Dortmund off die „Süd“ ömmer schbrötzt wie blöd, weil jeder Fan, der n Bierbecher in die Hand hodd, die Orm naufreißt, im Freudentaumel absichtlich sein Bierbecher leer mecht unn alles off die orme Deifel in die önndere Reihe schüdd. Ich, als gut unn sporsam erzoochener Mensch, stör mich doodroo genauso wie oo die unselige Bierdusche, die’s bekanntlich seit a boor Johr nooch Siegerehrunge gidd. Woos Dortmund betreffd, hobb ich amol gerechert. Off die Südtribüne stenn bei jedes Spiel so ömm die 25.000 Leut. Gschätzt 24.500 vo derre 25.000 senn Bierdrinker, ower nedd jeder hodd ees odder brengt nochmiddoch n halwer vier noch ees nei. Rechern mer amol vursichtig, däss 15.000 Fans während s Spiel Bier trinke. Wenn der 0,4er Becher im Schnitt halwer vool iss (monche hömm grod frisch gholt, bei annere iss ner bloß noch a Näägle dinn), schwabbe in jeder Sekunde voss Spiel grob gschätzt 3.000 Liter Bier off die Südtribüne römm. Unn wenn no a Tor für die Dortmunder fällt, werrn bein ekstatische Torjubel die 30 Hektoliter mit een Schlooch verschütt. Domit senn nebe doss Bier grob gschätzt aa ugfahr 20.000,-- Euro bein Deifel. Verröggd, odder?! Unn jetzt stellt euch vüür, s fällt a Tor, gidd n Videobeweis unn weeche Abseits würrd doss Tor zurückgenomme! 3.000 Liter Bier unn 20.000,- Euro für nix unn widder nix bein Deifel! Zur Beruhigung: die Biersurrde, die in Dortmund ausgschenkt würrd, nennt sich „Brinkhoffs“. Soo groß iss der Schoode unnder derre Ömständ domit nuu aa widder nedd …… Servus, der Eustach.

<< zurück