Fränggisch-Hessische Höflichkeit
Däss mir Franggn höfliche Leut senn, döfft jo wohl kee Frooch sei. Ömmer freundlich, aa wenn merr a weng zugegnöpft wirrge, ömmer hilfsbereit und ömmer höflich. Owwer däss mirsch mit die Höflichkeit monnichmoll aach üüwertreiwe, künnt mir ömmer widder nein Sinn, wenn ich oon Dölls Alfons vo Grösseneuscht denk. Der Alfons - leider iss er scho gschturrwe - woor a Schneider und ein Ausbund oo Ruh, Bescheidenheit unn Höflichkeit. Scho etliche Johr isses her, dässes bein Alfons ins Haus medde in die Nocht gebrönnt hodd. Und woss mecht der Alfons? Rennt durchs halb Durrf, oon Sirenegnoopf vorbei (er konn jo nedd s ganz Durf aufgewegg, bloß weils bei ihn brönnt ……) zuss Haus von Feuerwehrkommandante, n Neugebauers Rudolf. So weit so gut. Owwer der Alfons hodd nedd, wie merr jetzt oonahm dääd, gleich mit aller Gewalt noo die Haustür geglopft und laut „Feuer, Feuer!!!“ gschreit. Na, naa! Er hodd ganz normal geglingelt unn n Rudolf sei Fraa, wie die mit ihr Nochthemm verschloffe die Treppe roo komme iss, gfräächt, ob der Rudolf do iss. Wie die Paula leicht verwirrt „Ja“ gsocht hodd, seecht der Alfons: „Der söll amoll roo.“ Die Paula iss widder naufs Schlofzimmer, hodd n Rudolf geweggt und noo gscheggt. Und der Alfons seecht mit einer Seelenruh in sei Stimm: „Grüß Gott, Rudolf. Bei mir brönnts.“ Ja, so woor er, der Alfons. Ein Musterbeispiel oo Höflichkeit. Und jetzt mecht doss a Volksstamm nooch, vo den merr doss nie unn nimmer vermuut hädd: die Hesse! Rothemann, in die Näh vo Fulda, berühmt-berüchtigt für sei zwee Blitzkäste, wenn merr off die ee Seite nei und off die anner Seite widder naus föhrt, hodd jetzt entschiede, rechtzeitig vuur die zwee Säule a Schild „Achtung, Radarkontrolle!“ aufzustelle. Weil ich doss nedd geglääb kannt, wie mersch der Gotthold gsocht hodd, bin ich hie gforrn und hobb gsenn, däss sich die Rothemänner wallich sellwer üwerdroffe hömm. „Radarkontrolle in 80 m“ städd offs Schild. Gidds doss? Brauche die unner sauer verdients Geld nixmerr? Odder wunnern sich die hessische Wegelagerer jetzt drüü, däss kee Geld merr üüwer die zwee Blitzsäule nei die Gemeindekass künnt? Doss wär jo genau so, wenn ich vuur a Mäusfall a Schild „Achtung! Mausefalle in 30 cm!“ aufstell und mich wunner, däss ich kee Mäus merr fang. Owwer wer wääs. Derre Hesseköpf iss alles zuzutraue. Servus, der Eustach.