Wenn merr sidd, woss heut scho alles technisch möchlich iss, konn mersch scho a weng mit die Angst zu dunn griech. "Vernetzte Haustechnik" iss jetzt der neust Gluu. Alles iss mit alles verbunde unn glenna Gerätlich in die Häuser unn Wohnunge messe unn beobachte alles, ömm im Ernstfall eizugreufa. A Rauchmelder iss do jo noch a eefochs Beispiel. Owwer selbst soo a eefochs Gerätle iss droo schuld, däss die Dreiköönich nixmerr mit Weihrauch nei die Häuser gekomm könne, weil scho nooch drei Schwenker midds Weihrauchfooß der Alarm los geht unn die drei junge Monarche zuss Haus naus komplimentiert werrn. Ferngsteuerte Karaasch-Duure gidds jo aach scho lang. Unn aach die Technik iss noch orch oofällig. Der Gotthold hodd so a Duur und würrd ball verröggt! Sei Vodder hodd neulich n Herzschrittmacher gricht und jedesmoll wenn der Opa jetzt husst, gädds Karaasch-Duur auf. Ärgerlich! Unn doss würrd noch schlimmer! Du bist zum Beispiel a älterer Moo so wie der Gotthold und iich und musst nochts a boormoll raus. Die Haustechnik merkt, däss jede Nocht dreimoll die Gloospülung bedäädicht würrd und hält sogoor fest, däss dobei jeweils die glee unn nedd die größ Spültaste gedröggt würrd. Merr well beis glee Gschäft jo schließlich Wasser spoor. Vier Woche lang gädd doss so zu, bevuur du früh dein Fernseh eischaltst, persönlich begrüßt würrscht und gleich denooch Werbung für a Prostata-Mittel künnt. Root amoll worömm! Odder die moderne Fernseh. Prüfe angeblich permanent, obb die Aache vo die Zuschauer noch off senn. Und wenn se merrge, däss eener in sein Sessel eigschloffe iss, schalte se nooch fönnef Minudde automatisch aus! Wenn sich doss durchsetzt, sinke die gemessene Einschaltquoten so ab ellef, zwöllef Uhr nochts dramatisch ömm 50% unn mehr! Oder unner Kühlschränk. Sölle Kameras eigebaut griech, die gugge, woss dinn iss, ömm üüwern Computer dann a bassends Rezept vuurzuschlooche. Do wääs ich scho, woss bei mir für Vuurschläg komme: zwee Woche lang Äär in alle Variatione unn jeweils drei Bier dezuu! Ich sooch jo: der gläserne Mensch iss Realität, doss hobb ich scho lang gemerkt! Und wer off die Männer-Gloos vo die Autoboohraststätten mit ihr moderne Bissoaas hinner die Wand städd, durch doss glee dungl Fensterle guggt und offs Gnöpfle dröggt, wenn ich fertig bin und widder wagg laff, doss griech ich aa noch raus! Servus, der Eustach.