FREDI BREUNIG

Fredis Glosse

Glenne geeche Grösse (Mundart)

19.02.2019
Ömmer widder bralle im Laawe die verschiedene Extreme ofenanner: Gloosgruuchtrinker geeche Steegruuchtrinker oowe n Kreuzberg, Biobauer geeche „normale“ Bauer, Dürre geeche Degge, Orme geeche Reiche, Junge geeche Alte. Aach ömmer widder zu beobachte unn eener vo die ältste Konflikte in unner Gsellschoffd üüwerhaupt: Glenne geeche Grösse. Do setzt sich jo traditionell die SPD ei. Will jetzt „Hartz IV“ in „Bürgergeld“ umbenenn. Wenn heut eener een treffd unn gricht of die Frooch noochs Einkommen „Hartz IV“ zur Antwurrd, erschrickt er. Zukünftig, wenn die Antwort „Bürgergeld“ iss, würrd derjenich wohrscheinlich middn Hinweis „Du hossd‘s gschafft!“ beglückwünscht. „Glenne geeche Grösse“ bezieht sich oft of die schier Körpergröß, s Geld odder eewe of die sozial Stellung. Aach bein Verkehr: ömmer widder kämpfe die Glenne, in dem Fall die Auto, mit die Grösse, in dem Fall die LKW. Wenn mer groß unn mächtig iss, scheint mer mehr Rechte zu höm, doss berühmt „Recht des Stärkeren“. Wenn a Bus odder a LKW irchendwo neiföhrt, woos ächentlich ned erlaubt is ooder mit Warnblinker irchendwo stedd, beschwert sich selten jemand unn lässdn gewähr. Mer well sich mit die Grösse eefoch nedd ooleech. Aach im fließenden Verkehr nedd. Sie, die Grösse, lässes doo owwer aach oft raushäng. Wenn du mit a Auto n LKW üüwerholst unn s würrd knapp, weil eener entgeeche künnt: selten, däss der LKW bremst. So off die Oord: „Wenn du mich scho üüwerhol wissd, no seh, wie du vorbei künnsd!“ Oder steh oo a Kreuzung unn vo links künnt a mächtiger, vorfahrtsberechtigter LKW. Denk nedd dro, däss der weeche dir aach nur 2 km/h langsamer föhrt. „Du konnst gern rausgfohr, owwer denk jo nedd dro, däss ich weeche dir brems.“ Und so gugge se dann aach, wenn du kurz vuur ihr Führerhaus vorbei pfitzt: ungerührt, spaßfrei, eiskalt. Aach in die Tierwelt ömmer widder der Konflikt glee geeche groß. Mugge geeche Elefant zum Beispiel. Obwohl vill Leut aach vuur ganz glenne Tierlich n Heidenreschbeggd hömm. Woss wor doss früher ömmer a Drama, wenn unner Mutter onnde n Kaaler a glenns Mäusle gesenn hodd. Bevur der Vodder die Maus nedd stolz in die Fall‘ präsentiert hodd, hädde die Mutter kee zeh Gäul mer nein Kaaler gebrocht. Nedd selden hömm mir die selb Maus fönnefmoll gezeigt, weil mer die Neu nedd gricht hömm …….. Servus, der Eustach.

<< zurück