FREDI BREUNIG

Fredis Glosse

Drugg vo hinne raus (Mundart)

16.10.2018
Däss a Drääner in die Fußball-Bundesliga n haufe Geld verdient, dodrüü brauche merr jo wohl nedd zu reede. Getausch möcht ich midd een vo derre Herrn ower trotzdem nedd. Grod amoll siewe Spieldooch hodds gedauert, bis der erst Drääner gflooche is. Tayfun Korkut hässd er unn woor noch bis vuur gut zwee Woche der Chef bein VfB Stuttgart. Fönnef Punkte in siewe Spiele hodd er, der Tayfun, gholt, dann hömmsen n Laufpaß geewe. Hädde sei Fußballer so gspielt, wie er middn Vuurnome hässt, wär doss nedd passiert. Jetzt hässd der Drääner Markus Weinzierl unn es dääd mich nedd wunner, wenn bei den die Spieler mehr offn Boode lieche unn „Markus mache“ als stenn odder renne. Unn gugg n orme Nico Kovac bei die Bayern oo. Dreimoll hinerenanner nedd gewonne unn scho werrn die Messer gewetzt. Owwer sie falle jo wäch, die geschasste Herrn unn so richtig bedauer muss mersche nedd. Ower stellt euch amol vür, ganz normale Arbeitgeber dääde sich genauso vehald wie die Fußballvereine. Du bist zum Beispiel a Zimmermoo, schlecht drauf und haabsd dreimol hinneranner n Noochel gromm. Der Chef dääd die Aache verdreh und droh: „Een gromme Noochel noch, unn ich schmeiß dich naus!“ Odder du bist a Bürohengst, bassd beis Loche odder s Hefte vo a boor Blääder nedd auf unn die hänge no gromm in n Leitz-Ordner: Gelbe Karte, drohender Rauswurf! Odder bein Chef vo die Behörde, die für die Soolbrögge-Sanierung zwösche Neuscht unn Mühlbich/Salz verantwortlich iss: Vier-Augen-Gspräch unn die Drohung: „Aach nur noch een Dooch Verzögerung mehr unn du bist weg!“ In dem Fall gornedd schlecht! Weil die Drääner im Sport so unter Erfolgsdruck stenn, sennse Meister im Erfinne vo Ausrede. Ich erinner mich o a Sportschau n vergangene Winter, wo a Drääner vo Skispringer gsocht hodd: „Meine Springer hatten Probleme mit den starken Winden.“ Unn kee viertel Stonn später hömmse n Fußballlehrer a Mikrofon onnder die Nose ghalte unn er hood gemeent: „Meine Spieler haben von hinten heraus zu wenig Druck entwickelt.“ Ja, ja, ich hadd domols n gute Rood für den Herrn off die Zunge. Von wegen zu wenig Druck von hinten heraus entwickelt. Der söll sich amoll mit die Skispringer onnderhalt. Die wösse wie doss gedd! Reine Ernährungsfrooch. Federweißer, Zwiebelkuche – unn scho iss der gewünscht Druck vo hinne doo! Servus, der Eustach.

<< zurück