Ja, mit guud a Woche Abstand vo den denkwürdige G20-Gipfel in Hamburg iss merr als normalsterblichs Rhön-Grabfelder Landei ömmer noch fassungslos drüü, woss merr doo ins Fernsehn gsenn hodd. Barrikaden hömm gebrönnt und merr konnd live zugegugg, wie nedd emoll merr Vermummte Verkehrsschilder, Fohrräder unn Mülltonne beigezerrt und neis Feuer gschmesse hömm. Die Bolizei nerr bloß a boor Meter naawedroo, hodd owwer nix gemocht. „Geht doch endlich emoll hie und pack die Kerl, doss döffe die doch nedd!“ hodd merr sich dehemm inn Fernsehsessel denke ghört, owwer es iss nix bassiert. Und stell dir amoll vüür, a Fernseh städd oo soon dübbische vo unner Stammtisch unn die Ausschreitunge würrde gezeigt. Doo gäbs kee Diplomatie! „Bruder! Doo müsst ich als Bolizist dürrt sei, du!!! Hie, drauf unn nochert nei‘n Steebruch mit die Surrde! Off Strohlunge zunn Steinbach und Stee läss klopf! Vier Woche lang bei Wasser unn Brot! Die dääde nix merr oobrönn!!!“ Doss wäärn wohrscheinlich noch die gelindeste Maßnahme, die sich Stammtisch-Bolizissde ausdenk dääde. A Bundeskanzlerin konn sich sowoss natürlich nedd geleist. Do muss jedes Wurrd wohl überlegt weer: „Wer so handelt, der stellt sich außerhalb unseres demokratischen Gemeinwesens. Es gibt nicht die geringste Rechtfertigung für die brutalen Angriffe auf das Leben der Polizisten. Wer so handelt, dem geht es nicht um politische Kritik oder um ein besseres Leben für die Menschen auf dieser Erde". Genau! Guud, däss sie doss noch emoll so deutlich unn unmissverständlich gsocht hodd. Süsst wärrn mir, die fast scho zum Beichte genn, wenn merr amoll bei Rot üüwer a Fußgängerampel genn, vonn Glaube obgfalle. Ja: „Die Welt ist ein Stück weit aus den Fugen geraten“, wie unner jetziger Bundespräsident noch als Außenminister gsochd hodd. Owwer wie ömmer, hodd alles trotzdem sei zwee Seite. Oo Hamburg konn merr gseh, wie Wirtschaft funktioniert. Müllabfuhr, Glooser, Autohändler, Wasserwerke, Straßenreinigung, Schrotthändler, Pflössderer – alle hömm in die nächste boor Woche in Hamburg gut zu tun. Es lebe das Bruttosozialprodukt! Also, wie mache merr weiter? Der nächst G20-Gipfel ghörrd zu uns nei die Rhöö! Kloster Kreuzberg, Antoniussool! Für die Sicherheit surche sämtliche Stammtische vonn Landkreis unn die Feuerwehre! Mir bagge doss!!! Servus, der Eustach.