Als erschtes wünsch ich euch alles Gute, vor allem Gsundheit, zum neue Johr! „Brosst Neujohr!“ Höbbt ihr gut oogfange? Ich frääch dessweeche, weil in etliche Ehen der Haussegen weeche a unbassends Weihnochtsgschenk jetzt noch schief hängt. Der Gotthold zum Beispiel hodd heuer noch 30 Joohr Stillhaltes zum großen Gegenschlag ausgholt unn sei Fraa a Hilti gschenkt. Ihr wösst scho. Doss Gerät, wo bei fast jeden Moo s Herz höher schleecht, wenn merr den Noome bloß ausspricht. So a Art Thermomix für Männer halt. „A Buhrmaschine??! Ich gläbb, däss du spinnst! Die konn ich doch nie gebrauch!!“ hodd n Gotthold sei Fraa gezankt. „Ja, genauso weenich, wie ich die 30 Krawatte vo dir seit 1982, weil ich nämlich nie eeno noo mach!“, hodd mei Freund gekontert. Ganz neewebei: die Krawatt iss, wie ich jetzt geleese hob, „das am seltensten gewaschene Kleidungsstück des Mannes.“ Der Hammer, odder? Grod doss, wos jeder sieht, würrd n weenichste gewösche. Hängt owwer sicher nooch wie vuur midds Unvermööchen vo ville Männer zomm, a gscheits Gnöödle zommzubringe. Wie ich zum Beispiel bei die Bundeswehr entlasse wurrn bin, wor die Krawatt mei schärfste Waffe. Doss Gnöödle wor nooch 15 gebonndene Mooned so horrd – ich hädd kee Gewehr gebraucht! Dess ower nur neewebei. Mir müsse uns 2013 schließlich mit wichtige Neuerunge auseinannersetz. Zum Beispiel däss der Papst jetzt twittert. „Papst Benedikt ruft via Twitter zum Gebet für Syrien auf“ woor in die Zeitung gstanne. Do würrd nedd viel zommgehn! Die wo twittern, beete nedd unn die wo beete, twittern nedd. Blöd nä? Neu aach: die Praxisgebühr iss obgschafft. Endlich müsse mer nixmerr, wenn merr bein Dokter senn, als aller erschtes unnern Geldbeutel raus unn neewe unner Krankekassekörrdle aach gleich 10 Euro raus zerr. Annererseits hömmer domit etliche Kinner a wichtige Einnahmequelle genomme. Die Vööchelich vo heut hömm nämlich – raffiniert wie se senn – Dokterless ganz annersch gspielt wie mir sellemoll und zwor so: A Kind, wo knapp bei Kass iss, schlööd a annersch Kind vuur, Dokterles zu spiele. „Wie geht denn das?“ hodd doss gfräächt. „Ganz eefoch. Du setzt dich naus nein Gaang und lasst Zeitung. Dann ruf ich dich auf, du künnst rei und gibts mir 10 Euro.“ Aus und vorbei. Ab jetzt muss Dokterles widder so wie süsst gspielt wär!

Servus, der Eustach.