Die vergange Woche hodd mei Freund, der Mazi, in sei „Ned auszudenke“ scho üüwer die neue alte Nummernschilder gschriewe. Owwer weil doss Thema weltpolitisch so eminent wichtig iss, muss ich heut aach noch amoll dodrauf eigeh. Unner Landkreishäuptling Habermann hodd mit sei geballt Macht also tatsächlich entschiede, däss oo die Auto im Landkreis widder KÖN unn MET hiegschraubt weer döff. Ganz nooch dem Motto „Zurück in die Zukunft“. Reaktion im Landkreis Main-Spessart dozu: „Unsinn!“, „Humbug!, „Schwachsinn!“ Starker Tobak! Die Folgen sinn owwer aach unabsehbor. Du konnst bei derre neue, alte Schilder jo nedd innerhalb von Landkreis unterscheid, obs eehner gricht odder nedd. Doss wär jo Diskrimierung. Wenn zum Beispiel a Sandberger Moo König hässt, 1955 geburn iss unn für sein Golf KÖN - IG 55 beantragt, muss ersch griech! A Sandberger mit Könshöfer Nummer! Der wenn vo die Polizei ooghalte würrd unn s Rede oofängt, denkt sich der Schandorm doch gleich, däss doo woss nedd stimmt. Oder nahm n Strohlunger, der für sei Laawe gern Mettwurscht isst, nedd wääs, däss merr doss annersch schreibt wie Honigwein, unn MET – WU 23 für „Metwurscht“ off sei Auto will. A Strohlunger mit Mellrichstädter Nummer. Etikettenschwindel hoch vier! Beim Nochdenke dodrüü iss mir aufgfalle, dässes jo aach saublöd sei muss, wenn du Wurscht odder Wurst middn Nochnoome hässd, Medizin studierst, Arzt würschd und später „Dr. med. Wurst“ off dei Praxisschild schreib musst. S söll Leut geb, die allee aus den Grund vo a Medizinstudium obbgsenn, unn doch lieber een of Philosophie gemocht hömm. Owwer ach doss iss nur ratsam, wenn du nedd zufällig „Glück“ mit Nochnome hässt, weil „Dr. phil. Glück“ jo aach zu Speggulatione verleit konn. Dess ower nur neewebei. Wenn mer sich s Grabfeld so betrocht, muss mer sich scho wunner. Woss do wohl obgeht? A eechene Währung („Grabfelder“), a eechene Gruppe im Kreisdooch („Wählerinintiative Altlandkreis Königshofen“) und jetzt aach widder s KÖN-Schild zurück. Wohrscheinlich nerr bloß noch a Frooch vo die Zeit, wenn sich die Grabfelder für unabhängig erklärn und mit n Josef Demar ihrn neue Landroot präsentiern. Fürn Bezirksdooch kandidiert er jo eh scho. Worrds obb, do licht woss in die Könshöfer bzw. Bordfer Luft!

Servus, der Eustach.