Vuur gut drei Woche hodd sich mei Neffle n Spaß mit unner Oma erlaubt. „Oma!“ hodd er gsocht, „Der David Bowie iss gsturwe.“ „Wer iss gsturwe?“ „Der David Bowie.“ „Wer? Müsst ich den kenn? Woor der nedd vo Weisbich?“ „Nee, Oma vergess es.“ Ein Vööchele! Owwer es iss doch schöö, wenn Jung und Alt heutzudooch noch onnder ee Dooch wohne. Iss selten genug, obwohl’s heut jo mehr alte Leut gidd wie je zuvor. Demokratischer Wandel odder so ähnlich nennt merr doss. Die Alterspyramide iss offn Kopf gstellt und zum Dääl hodd doss Auswirkunge, mit denne mer nie gerechert hädd. In Lohr am Main zum Beispiel. Do würrd jedes Johr die Spessartfestwoche gfeiert und die Stodt hatt sich 1990 woss Schöns eilässfall. Merr hodd alle Senioren vo Lohr über 70 zum Seniorennochmiddoch eigeloode und jeden a halbs Hähnle und a Mooß Bier spendiert. Immerhin 1.137 Leut senn domols komme und hömm sich läss verköstig. 2015 gabs dann scho sage und schreibe 2.200 (!) Ü70-ler und die Stodt hodd gstöhnt, weil die Spendierhose mit die Zeit doch ganz schö teuer komme iss. Also hodd der Stadtrat neulich beschlosse, die Altersgrenz für die Einladung zunn Seniorennachmittag bei die Festwoche extrem vo 70 off 71 Johr oozuheewe. Riesenproteste, Leserbriefe, heftige Kommentare in die soziale Netzwerke worrn die Folge und scho vier Dooch später hodd der Stadtrat sein Antrag zerknirscht widder zurück genomme. Jetzt würrd widder ab 70 eigeloode und s gidd Bier und Hähnlich gratis. Ja, der demokratische Wandel. Die Geister die ich rief ……. Hodd scho Auswirkunge! Aach für die Landrät. Monche hömm sichs, zum Beispiel in Rhön-Grabfeld, zur Gewohnheit gemocht, ab n 100. Geburtsdooch jedes Johr persönlich, also mit Besuch, zu grateliern. Jetzt nimmt doss mit die Zeit owwer Ausmaße oo, die zur Lösung nur zwee Möglichkeite lässe. Entweder merr künnt zukünftig erscht ab 120 bei die Geburtsdoochskinner (!) vorbei, odder merr ernennt ungfähr 10 stellvertretende Landrät. No dääd merr einigermaßen römm komm. 8 vo derre 10 Stellvertreter machede nix annersch wie Leut Ü100 zu gratliern, die annnere zwee und der Chef erledige die normal Ärwet. Ja, mir werrn halt alle ömmer älter. Bei mir geht’s aa los. Ich fohr jetzt zum Beispiel deutlich schneller Auto wie früher. Worömm? Däss ich oo komm, bevuur ich vergesse hobb, wo ich hie wollt. Servus, der Eustach.