Wie jeder vo uns hobb natürlich aach iich in die vergangene Woche jede Menge üüwer Dobbing in die Zeitung gelasst. So lang sichs ömm doss ganz normal Dobbing, also mit Tablette, Sprötze, Eigenblut usw. vo die übliche Verdächtiche wie Roodfohrer, Gewichtheber, Kugelstoßer unn doss ganz Gschworrdl ghannelt hodd, wor mir doss ächendlich wurscht. Wor jo eh gloor. Owwer seit mir neulich, wie ich mit mei Fohrrod völlig untrainiert widder amoll naufn Kreuzberg fohr wollt, woss bassiert iss, bin ich richtig bös wurrn. Ich muss vorausschegg, däss ich seit Jahren aach dobb. Ower kee Angst, bei mit hanneld sichs ömm rein geistichs Dobbing, also Mental-Dobbing. Ich komm völlig untrainiert praktisch nur naufn Kreuzberg, indem ich mir beis Nauffohrn ständig a schö kühls Kreuzberg-Radler und a Kaasbladde vurstell. Und so bin ich neulich, völlig untrainiert, dafür owwer mental dobb gedobbt also widder losgfohrn. S erscht moll hobb ich mich gewunnert, wie mich Richtung Bildeiche a ca. 65-jähriger Moo üüwerholt hodd. Guud docht ich, wohrscheinlich mental besser gedobbd wie iich. Stellt sich statt a Radler und a Kaasbladde wohrscheinlich a richtigs Bier und a Kreuzbergbladde vuur. S zwedd moll hobb ich mich gewunnert, wie mich Richtung Katzebuggel a ca. 70-jährige Fraa owwer sowoss vo üüwerholt hodd! Guud docht ich, wohrscheinlich mental besser gedobbd wie iich, die Fraa. Stellt sich statt a Hallwe und a Kreuzbergbladde wohrscheinlich a ganz Mooß und a Schweinshaxe vuur. Und s dreddmoll hobb ich mich ball vereggd geärchert, wie mich off die Familienabfahrt in Höh Gemündener Hütte a ca. 75-jähriger Moo owwer sowoss vo läss steh hodd, däss ich gedocht hobb, ich spinn! Owwer wie ich beim Üüwerhoole gemerkt hobb, däss bei ihm woss summt, docht ich erscht: Orrme Sau, jetzt föhrt er zwoor schneller wie ich naufn Kreuzberg, owwer defüür hodd er n Schwarm Bie oon Haals. Bis ich gsenn hobb, däss er a woss elektrisch zwösche die Bee hodd. Also jetzt nedd falsch versteh. Nedd direkt zwösche die Bee hadd er woss elektrisch, sondern a weng weiter unnde. A E-Biker!!!!! Der nächst Dobbing-Skandal! Keine Chancengleichheit mehr oo Rhön und Grabfelds Hüggel. Dobbing nedd nur in L’Alpe d’Huez, oon Mont Ventoux odder n Tourmalet. Naa, jetzt aach in Schmolwasser, n Sambich nauf odder oon Löhredder Berg. S iss nixmerr schöö!

 

Servus, der Eustach.