Annere Länder, annere Sitten. Doss hobb ich mir gedocht, wie ich in die vergange Woche vo „Thanksgiving“ in Ameriga düüwe gelasst hobb. Doss iss so a Oort Erntedankfest off ameriganisch und würrd jedes Johr oo n vierte Duurschdich im November gfeiert. Ein Riesenfest, gsetzlicher Feierdooch, bei dem traditionell alle Familien zomm komme unds amoll so richtig krach lässe. Merr trefft sich, setzt zomm, unterhält sich, trinkt und esst natürlich. Und wie! Doo würrd so richtig neighaut! Und woos? Truthahn natürlich! Ganz Ameriga esst oo dann Dooch Truthahn - Bibbgööger wie mir bei uns seecht - und so wunnerts een nedd, däss jedes Johr oo den eene Dooch sage unn schreibe 45 Millionen Truthähn in Ameriga gesse wärrn. 45 Millione! Und vier devo wärrn jedes moll feierlich von ameriganische Präsident begnadigt und nedd gschlochd. Domit iss die Schoos fürrn ameriganische Truthahn, den berühmte Feierdooch zu üüwerlaawe, ungfähr so groß, wie bei uns n Sechser im Lotto zu hömm. Jedes Johr 45 Millionen Truthähn in Ameriga weenicher. Hässt doss aach, däss 45 Millione Truthennen Witwe wärrn? Quatsch! Hobb ich aa nedd gewösst: Truthähn, die gschlocht werrn, senn männlich unn weiblich, genauso wie die berühmte „Hähnlich“ bei uns keinesfalls nur männliche Hünner senn. Der weiblich Truthahn hässt üüwrigens Pute. Doss iss für uns Franggn a schwersch Wurrd und konn zu Missverständnisse gführ. Mei Mutter iss vuur etliche Johr amoll mit a annere Fraa n Sonndich vo die Kirch hemmgelaffe und wie merr sich a Zeitlang unterhalte hadd, hodds die anner Fraa off eemol eilig ghood, weil sie, wie sie läss wöss hodd, „ihr Bude noch putz muss“. Komisch, hodd mei Mutter gedocht. Jetzt, n Sonndichmiddoch, wo annere Leut koche, muss die ihr Wohnung sauwer mach? Schmarrn! Natürlich sollts „Pute“ gebb und die musst eewe noch geputzt weer. Ja, mir mit unner Sprooch! Iss jo aach nedd so eefoch. Missverständnisse senn do aach bei Vuurnome nedd auszuschlisse. Do würrd bei Kinner der Tim zunn Dimm, der Patrick zunn Baddrig und die Tatjana zu die Daddjana. Gedd jo noch. Wenn owwer a fränggischer Moo zum Beispiel Theo hässd, sei Fraa Brobleeme mit Achselschweiß hodd und im Freundeskreis laut jommert: „Mei Deo hodd widder amoll versaacht!“ Doss iss für unnern orme Deo, ähh, Theo no scho blöd, odder? Servus, der Eustach.