Vill Leut müsse jeden Dooch off die Ärwet und hoffe drauf, däss alles einigermaßen gut lefft. Wie schö isses doch, wenn merr hemm künnt, die Fraa odder der Moo fräächt, wies denn heut beis Schaffe woor und merr guten Gewissens gsooch konn, däss merr ganz zufriede woor. Owwer nedd ömmer klappt alles! Üwerleech amoll, wie vill verschiedenste Leut zu een unn n sellwe Zeitpunkt die unterschiedlichste Brobleeme hömm. N Maurer iss der Speis zu dünn, gleichzeitig stürzt für n Bänker a Aktienkurs ins Bodenlose, a Erzieherin in a Kita mecht eener vo die Zwoggel nei die frisch Windel, während n Rhönrancher in die Hochrhön der Fuchs scho widder a schwedisch Birkhuh gholt hodd. Owwer doss iss alles nix geeche doss, woss in die vergange Woche der NASA bassiert iss. Stell dir vuur, du bist a leitender NASA-Inschinjör und verabschiedst dich mit n degge Kuss vo dei Fraa, ohne zu versämme, dei Herzallerliebste noch drüü zu informiern, däss in dei nächst Schicht a unbemannte Rakete mit 21 Kleinsatelliten, n Detektor für Meteoriten und ca. 2.000 kg Lebensmittel für die Besatzung vo die ISS nei'n Weltraum gschosse weer söll. Und wie du zwee Dooch später wie erschlooche und toodmüüd hemm künnst und die Fraa fräächt, wie’s woor, nur gsoch konnst: „Frääch liewer nedd!!!“ 200 Mio. Dollar bein Deifel und die Rakete mit alles woss dinn woor scho nooch a boor Sekunde nerr bloß noch Schall unn Rauch. Üüwerhaupt in die Raumfahrt zu schaffe! Wenn du als Schreiner off Mondaasch föhrscht und 300 km vo dehemm merkst, dässda die Buhrmaschine vergesse hosst, föhrschte zunn nächste Baumarkt und käffst dir eene. Owwer komm als Astronaut als Ablösung nauf die ISS, kriech durch die Schleuse, begrüß dein russische Kosmonaute-Kolleche und hör die Frooch: „Hast du Flansch dabei?“ Wenn du dir dann mit die floch Haand off die Stirn schlööst und zugebb musst: „Auuuuuuuh! Der licht noch onnde!!! Deifel noch amool, den hömmer vergesse!“, wässd du genau, däss woss schief gange iss, woss du nedd so schnell reparier konnst. Also: wenn du demnächst als Elegdrigger n Kurze baust, dir als Köchin a Löffel nein Dääg fällt odder als Strösser beis Ausruhen der Schaufelstiel oobrecht, denk oo den leidende (kein Schreibfehler!) NASA-Inschinjör und bau dich auf, indem du dir seechst: "S gidd Schlimmersch!" Servus, der Eustach.