Wie ich neulich bei die Maybrit Illner ins Fernsehen a Diskussion üüwer „Share-Economy“, so a Oort Freizeitsozialismus, gsenn hobb, musst ich mir widder mei Gedangge mach. Doo gädds doodrömm, däss Leut Zeuch für annere oobiete, wenn sie's sellwer grood nedd brauche. A Auto zum Beispiel würrd nur ungfähr 50 Minudde omm Dooch genützt, in die üüwrig Zeit städds nutzlos römm. Owwer iss doss sogenannte „Car-Sharing“ wallich woss Neus? So vuur 20-30 Johr wor doss bei Mähdröscher völlig normal! In jedes Durrf hodds mehrere Mähdröscher gaawe, die sich zwee, drei odder vier Bauer mitananner gedääld hömm. Blöd worrn mir jo domols scho nedd! Bei a Kiste wie n Mähdröscher, der monatelang ungenutzt in a Hall römm städd, woorsch domolls scho normal unn logisch, ihn sich zu dääle, ömm die Nutzzeit in die boor Woche Ernt voll auszunütze. Und heut welle se uns „Car-Sharing“ als ganz woss Neus verkäff? Lachhaft! Ich hädd doo noch mehr Ideen. Mei Kaffeemaschine zum Beispiel brauch ich bloß 10 Minudde n Dooch. Wer se früh ab neu Uhr well? www.middn-eustach-dääl.de. Odder mein Roosemäher? Brauch ich bloß vo April bis September. Wer vo Oktober bis März Bedarf hodd? www.middn-eustach-dääl.de. Mei Schneeschieber: Vo Dezember bis März gädd nix, owwer dann wär er frei. Wer welln? Nähere Infos: www.middn-eustach-dääl.de. Odder noch extremer: mei Zoohbürschdle. Brauch ich jeden Dooch nerr bloß früh zwösche Sechs unn viertel Siewe unn oowerts zwösche Ellef unn viertel Zwöllef. Wer se in die üüwrig Zeit well? www.middn-eustach-dääl.de. Und: mei Gebiss! Vo ellef Uhr oowerts bis sechs Uhr früh könnts jemand ghobb! Bedingung: Früh muss off jeden Fall widder doo sei, süsst gricht derjeenich Ärger – unn ich Hunger! Und mein Mobbedhelm. Den muss ich nedd mit jemand dääl, den konn demnächst jemand für ömmer ghobb, weil ich ihn üüwerhaupt nixmerr brauch. Worömm? Weil demnächst s Ergebnis vo a intressande Untersuchung zu uns rüüschwabbd, die jetzt bei unner Nochberr in Österreich gemocht wurrn iss. Doo würrd ab sofort die Helmpflicht für Motorrodfohrer obbgschafft. Hobb ich gelassd. Worömm? Merr hodd a Untersuchung gemocht und vonn Fernsehturm in Wien erscht n Motorrodhelm und dann a Zöpfelkabbe roo läss fall. Ergebnis: der Helm Totalschaden, die Zöpfelkabbe wie neu! Servus, der Eustach.