So, die Fußball-WM iss hallwer römm und merr künnd oowerts fast nixmerr vo die Kiste wagg. Etliches iss mir bis jetzt aufgfalle. Däss doss bei mir kaum woss middn Fußball zu dunn hodd, könnt ihr eeuch gedenk. S erscht: neidisch bin ich! Nedd off die durchweg ranke unn schlanke Fußballer. Naa, offs Wadder in Brasilien. Do iss jetzt tiefster Winter und der hodd zum Beispiel in Rio a Durchschnittstemperatur vo 23 Grad! Die Sonn brönnt roo in die Stadien und trotz Winter könne die Deifel s ganz Johr nausses Mähdröschern! Nedd wie bei uns, wo du als Bauer laufend naufn Himmel gugg musst und unter grösstem Stress innerhalb vo a boor Woche alles roo hau musst. Owwer zurück zu die Fußballspiele. Ich wunner mich zum Beispiel drüü, wie dies hiegricht hömm, alle insgsamt 736 Spieler fürs Zeige vo die Mannschaftsaufstellunge so hiezustelle, dässe erscht wagg gugge, nocher die Orm verschränke und dann meistens gelangweilt und ernst nei die Kamera gugge. 736 moll die gleich Erklärung und der gleich Zirggus. Der Kameramann höggt jetzt wohrscheinlich in die Glabbsmühl! Owwer worömm müsse die do alle ihr Orm verschränk? Ich hobb mich widder emoll genau informiert, unn s Indernedd gfrächt, woss psychologisch dehinner städd, wenn jemand die Orm verschränkt. Die Antwurrde zeiche, däss doss bei die Fußballer goornedd gstimm konn. Leut verschränke die Orm vuur n Körper, wenn sie: 1. Schutz suchen, 2. in der Fremde oder in ungemütlicher Enge sind, 3. bei verbalen Angriffen oder 4. beim Gefühl der Kälte oder des Unwohlseins. Alles Schmarrn, odder? Ich wääs, worömms die Fußballer mache. Gugg dir bloß amoll die Chilene odder die Iraner oo. Die Orm vo fast alle Spieler vo oowe bis onnde däddowiert! Wohrscheinlich senn doss alles Werbeaufnahmen für die kommend Dadduu-WM in Wääs-der-Deifel-wo! S iss doch fast kee Spieler debei, der nedd irchendwo a Abziehbildle droff hodd! Die möcht ich amoll alle naggert onnder die Dusche gsäh! A Museumsbesuch midd a Bilderausstellung iss a Dreeg degeeche! Ja, ja. Dadduus. A ganz fußballverröggder Moo hodd sich jetzt n Schweinsteiger off sein linke undn Özil auf sein rachte Oberschenkel däddowier läss. Stellt sich naggert vor sei Fraa hie und fräächt "Kennste die zwee?" Drauf die Fraa: "Naa, die zwee kenn ich nedd, owwer der in die Medd müsst der Lahm sei." Servus, der Eustach.