Wenn merr jetzt n Frühling erlabbt, merggt merr widder amoll, woss unner Herrgott domols bei die Schöpfung Wunderboorsch geleist hodd. Jedes Johr s gleich Speggdaggl, wenn scho ganz früh die Vööchelich singe und sich die Natur vo ihr schönst Seite zeicht. Und woss sich unner Schöpfer domools alles ausgedocht hodd, hobb ich jetzt in a hochintressants Buch gelasst. Der Gabelbock zum Beispiel iss eenerseits off 100 m deutlich schneller wie der Usain Bolt, annererseits rennt er die 10.000 m in 12:30 Minudde! Weltrekord bei die Mensche: 26:22. A Gorilla könnt 900 kg gstömm und a Schneeleoopard springt logger 14 Meter weit. Weltrekord bei die Mensche: lächerliche 8,95 Meter. A Kamel säuft 200 Liter Wasser in a viertel Stonn, a Eisbär muss oft monatelang nedd bies (es wär ihm bei die Kält aa nedd zu roode …..). Bei die Löcherkraken wiecht s Männle 0,25 Gramm und iss 3 cm lang. S Weible is zwee Meter lang und wiecht fönnef Kilo. Nedd verwunnerlich, däss Er nooch die Begattung vo Ihr stirbt. Merr sidd, däss der Herrgott a Welt erschaffe hodd, wo du ausses Staune nixmerr raus künnst. Owwer: es senn aach Fehler gemocht wurrn. Für mich der Hammer: der Guggugg. Woss hodd merr sich denn do dabei gedocht??? Doss frech Viech schmeißt jo bekanntlich die Ähr vo die Wirtsvööchel aus derre ihr Nest und leecht seine nei! Und doss iss scho alles, woss Vodder unn Mudder Guggugg leiste! Ausbrüt lässt merr vonn Wirtsvoochel, und fütter natürlich aach. Und guggt dir die Bilder oo, wenn zum Beispiel a glenner Zaunköönich soon fette Fratz vo Guggugg füttert. Nedd nur die Oostrengung, die der glee Voochel midds Beischaffe voss Futter hodd. Nää, aach die psychisch Belastung. Du hossd bis jetzt ganz gute Erfohrunge middn Nochwuchs gemocht und heuer höggt off eemol a Bruut ins Naast, wo du denkst: "Ja sooch amoll, wo fresst denn der alles hie! Der muss doch amoll sood wär!!!" Woss ich nedd versteh: der Noah hädd den Fehler domols mit sei Arche logger korrigier könn. Eefoch keen Guggugg mit drauf gelesse und Ruh wär! Apropos Noah: worömm der domols aach Schnogge, Braame, Hyäne unn soe Zeuch offs Schiff gelässe hodd, versteh ich nedd. Owwer wie seecht der Gotthold: "Auch die Sonne hat Flecken!" A Idee hätt ich jo: merr söllt amoll prowier, Schnogge mit Glühwürmlich zu kreuze. Worömm? Ganz eefoch. No dääd merr se nochts weenichstens seh! Servus, der Eustach.