Jetzt well ich noch amoll off mei „Geldschein-Karriere“ vo vuur zwee Woche zurückkomm. Ich hatt jo gschriewe, woss a 10 €-Schein vo die Karin Seehofer bis zunn Siichmar Gabriel alles mitgemach könnt. In mein vorab verdäälde Entwurf hatt ich n Landroot in Wochelshause fönnef Schoppe Wei läss trink. Sofort hodd sich eener gemeldt, die Gschicht zwor gelobt, owwer gemeent, ich hädd n Landroot bloß drei Schoppe trink söll läss. Fönnef wärrn zuviel. Und gleich hobb ich gemerkt, wie schöös iss, wenn merr woss frei erfinn konn und somit a Oort Luftschloss gebau konn. Freilich hätt ich n Landroot nerr bloß drei Schoppe trink läss könn. Ich muss owwer aach a weng oo die Vereinsgemeinschofft Worchelshause denk. Die wella jo aach ihr Gschäft mach. Außerdem hätt der Landroot mit drei Schoppe noch keen Kopfwärtich ghood unn somit kee Aspirin gebraucht. Am Schluß hömmer uns off vier Schoppe geeinicht. So hatt der Landroot woss devoo, die Worchelshäuser hömm a Idee mehr Umsatz gemocht und die Abodeeg in Brend hodd immerhin a Beggla Aspirin verkäfft. Der Landkreis hodd gebrommt unn floriert. Merr konn bei sowoss schöö die Bobbe läss tanz und alles so hie gedrääh, wie merrsch braucht. Muss jo nedd stimm. So ähnlich isses aach, wenn irchendwo a Wohltätigkeitsveranstaltung (neudeutsch: "Benefiz") veranstalt würrd und danooch ausgerechert weer söll, woss für den jeweilige gute Zweck üüwrig gebliewe iss. Söll natürlich ömmer so vill wie mööchlich sei. Wie der Gotthold unn iich verganges Johr midd unnern Hoosekühlesverein so a Veranstaltung gemocht hömm und mir n Zauberer eigeloode hatte, hatt der Gotthold die Idee. "Mir sooche unnern Zauberer eefoch, er söll 5.000 € verlang, dann owwer weeche Benefiz off sei Geld verzicht und prompt hömmer scho amoll 5.000 € üüwrig. Gut, nä? In den Zusammenhang gidds -– ähnlich wie bei Arbeitszeugnisse - üwrichens a Geheimsprooch, oo der merr erkennt, woss a Künstler gekosst hodd. Wenn eener woss für 50 € mecht, hässds: "Er konnte dafür verpflichtet werden." Wenn eener woss für 500 € mecht, seecht merr: "Er konnte dafür engagiert werden." Und wenn eener woss für 5.000 € mecht, hässds: "Er konnte dafür gewonnen werden." Und so hobb ich mich aach jetzt widder orch drüh gfräät, däss ich dafür gewonnen werden konnte, doss Gschichtle doo zu schreiwe. Servus, der Eustach.