FREDI BREUNIG

Fredis Glosse

Biergorrde 4.0 (Mundart)

15.05.2018

Borömm rede die Leut heutzudooch nix merr mitenanner? Weil merr uns een  „Kommunikationsbunggd“ noch n annere genomme hodd! Beispiele gfällig? Früher wor merr nooch die Kirch zommgstanne unn hodd sich onderhalte. Gidds nix merr, weil keener mer nei gedd. Oder die Durfwirdschoffde. Do iss früher Bolidigg dinn gemocht wurrn unn wer nedd nei iss, hodd nedd mitgricht, woss ins Durf los iss. Aus! Die Mellichsammelstelle. Der Kommunikationsbunggd schlechthin! Wagg, furrt! Heutzudooch die Banken. Merr konnd sich wenichstens amoll mit a Fraa odder n Moo hinner a degge Gloosscheibe onderhald. Nedd amoll doss Mindestmaß oo Onnderhaltung lässe se uns: Auszugsdrucker, Geldautomate, Filialenschließunge. Fertig, aus! Gut, genn merr halt nei n Biergorrde und rede a weng mit die Bedienung. Die Bedienung? A boor enzelne gidds noch, owwer s künnt der Dooch, wo a Bedienung seltener iss wie a Organist oder a Birkhuh in die Rhöö. Apropos Organiste: jetzt gidds scho Kircheorgel, die automatisch spiele! Irchend a brogrammierder Brogge würrd of die Taste geleecht und spielt alle Lieder, die merr well. So weit senn mer! Zurück zu die Bedienunge. Wie sölls weer, wenns goor keene merr gidd? Biergorrdebesuch 4.0 (2030): rein äußerlich sidd alles aus wie heut. Disch, Bänk, Glabbstüll, Kastanie, Schotter. So, jetzt woss zu trinke! Du entdeckst n Automat, stellst dei mitgebrochts Grüüchle onnder n Zapfhohn, schmeißt Geld nei die Kissde und bist kurze Zeit später „online“ mit die Karmeliterbräu. Üwer a kilometerlang, unterirdisch Beiblein (engl.: Pipeline) strömt a süffigs Karmeliter Dunkel in dein Hoofe nei. Hunger! Widder hie zunn Automat, Geld nei, bis kurze Zeit drauf der diensthabend Metzger off a Dissblei (engl.: Display) erscheint und dich freundlich lächelnd fräächd, woss da ess wissd. „A beleechts Bröödle mit Schinkewurschd“ rötscht dirs verleechen raus. „A beleechts Bröödle???“, blärrd der erzürrnt Wurschdmechaniker. „Du gläbbsd ower nedd, däss ich daswaache 5 km fohr, odder???“ So odder so ähnlich würrds werrn. Alles automatisch, alles elektronisch, alles kaalt, unpersönlich. Unn wenn no der dressiert Biergorrde-Roboter automatisch off dich zumarschierd unn dich mit sei furchtboor mechanisch Stimm zu a „Prost“ auffordert, würrsch du richtig grandich unn raunzt ihn oo: „Nee! Mit jeden, owwer mit dir nedd!!!“ Servus, der Eustach.


<< zurück