So, heut unn murrn noch, dann iss der Juli für heuer römm. Der hodd neighaut, he?! Jeden Früh senn merr aufgstanne, hömm zuss Fenster naus geguggt unn der Planet hodd scho widder geglüht! Do hodd merr amoll gsenn, wies wär, wenn merr kee Johreszeite hädde. Schlimm, odder? S iss heutzudooch owwer aach alles so ungleichmäßig verdääld. N Juni bissde midds Ausleern vo Franggens wichtichsts Utensil im Gorrde, n Reechenmesser, nedd noochkomme, n Juli hässde Blomme nei könn gsetz odder a Vööchele hädd nei könn gebau! N Juni viiel zu vill, n Juli fast nix! Do iss jo oowen Kreuzberg mehr Weihwasser gebraucht wurrn, wie’s in die ganz Rhöö gereent hodd! Owwer die Reechenmenge für die zwee Mooned stimmt im Durchschnitt doch. Doss iss halt Statistik! Wenn a Jäger eemol links oo n Hoos vorbeischisst, unn dann rechts, hodd eern rein statistisch genau in die Medd getroffe. Ja, die Hitz. Nedd eefoch für Mensch unn Tier. Obwohl ich ömmer widder beobacht, däss ville Tiere gscheiter senn wie mir Mensche. Laff zum Beispiel bei 35 Grad oo a Kühwääd odder a Wiese mit Hünner vorbei, wo a Baam droff städd odder woss annersch, woss Schodde mecht. Die Küh odder Hünner senn ömmer doo, wo der Schodde iss. Unn laff in Neuscht bei 35 Grad oos Trimare vorbei. Wo lieche Mennlich unn Weiblich mit ihr McDonalds-genährte Leiber? In die prall Sonn! Ich soch jo – die Hitz. Und noch schlimmer: Sahara-Hitz! Die hömmer, wenn die Algerier unn Marogganer ihr häss Sahara-Luft nedd brauche unn middn Wind zu uns raufschegge. „Und wie merkt merr, däss merr ausgerechert Sahara- unn kee normale Luft hömm?“ hodd mich der Gotthold gfräächt. „Ganz eefoch. Erschtens isses sauworm. Zweddens konnst du en eefoche Test gemach, musst owwer saumäßig aufpass. Du gässt naus, sperrscht dei Maul weit auf und leffst so ungfähr fönnef Minudde lang durch die Geechend. Musst halt see, däss dich keener sidd. Wenn da nochert s Maul zumechst und es gnirbelt zwösche die Zeeh, dann hömmer Sahara-Luft. Wässt scho, der Saand. Aufpass mussde, dässde dann nedd gleichzeitig nei a Wanne mit Zement fällst und Wasser drauf trinkst. Süsst konnsde bein Beton-Englert in Wölferschause als Ausstellungsstögg oogfang. Als Beweis dafür, woss merr heutzudooch mit Bedong scho alles gemach konn …………

Servus, der Eustach.