Unbestreitboor iss, dässes heutzudooch Brobleme gidd, die früher scho rein technisch eefoch nedd möchlich worrn. Les ich doch neulich im Bolizeibericht, däss in die Leitstell in Schweiwert a Notruf eigange iss, oos Telefon owwer niemand zu hörn wor. Der Sachbearbeiter hodd den Anrufer oogsproche, owwer kee Antwort gricht. Stattdessen worrn im Hintergrund laute Geräusche zu hörrn, so däss merr mit alles rechne musst. Also iss a Bolizeistreife doo hie gscheggt wurrn, wo der Notruf herkomme iss (sowoss gädd heut ganz leicht), hodd owwer nerr bloß n Moo oogedroffe, der off sein Hof römmgewergelt hodd. Rausgstellt hodd sich dann, däss der Moo sei Handy in die Dösche stegge hadd und unbeabsichtigt n Notruf ausgelöst hodd. Er hodd dann sei Mülltonne durch die Geegend gezerrt und die hodd merr üüwers Telefon bis off Schweifert ghört und dürrt mitm Schlimmste gerechert. Bassiert! Und stell dir amoll vuur, du höggst bequem in dei Wohnzimmer, dause is a Säukält und zur Unterhaltung ziehst du dir den berühmte Horrorfilm „Kettensägen-Erwin“ nei. Hossd dei Handy in die Hosedösche und wie du dich nüü zu die Chips beugst, künnst du off die Notruftaste und bist live mit Schweifert verbunde. Der Fernseh iss laut gstellt und der Mörder gedd grod mit die Motorsaache laut schreiend off sei Opfer los. In Schweifert schrille sämtliche Alarmglogge und die ganz Maschinerie würrd in Gang gsetzt: Bolizei, Feuerwehr, Notarzt, Rettungswagen, Notfallseelsorger. Dei Telefon würrd geort, Sirene, Martinshorn, Blaulicht vuur dei Wohnzimmer und du denkst: „Do muss irchendwo widder woss bassiert sei!“ Scheißerleschieß! Du und dei blöds Handy senn oo den ganze Aufstand schuld! Peinlich. Und teuer! Merr konn eefoch nedd genug aufgebass! Doss gild aach für die Agdööre vo die ganze Brunksitzunge und Kabbeobende, die jetzt widder landauf, landab absolviert werrn. Der nächst Büttenredner iss scho verkabelt und mit Mikrofon (Hedd-Sedd) ausgstatt. Weil er so aufgereecht iss, hodd mersch aach scho eigschalt und er iss praktisch scho of Sendung. Der Aggdöör muss vuur lauter Aufreechung owwer noch amoll offs Klo und der ganz Sool hört live mit, wie er sei Gschäft verricht und - ooständich wie er iss - gründlich spült. Und der Erich oo Tisch 5 seecht zu sei Fraa: „Endlich reents widder amoll. Zeit iss wurrn!“ Servus, der Eustach.