Woss woor die Welt früher doch eefoch. Ich hobb wir doss vuur ees, zwee Woche gedocht, wie ich in die Zeitung die Berichte üüwer die neueste Auflooche bei die Faschingszüüch gelasst hobb. Doo brauchst du jo fast a Studium! Früher hodd jeder sein Wooche gebaut, oogemoolt, gschmückt, n Kossde Bier drauf gstellt und los iss gange. Kee Sau hodd oo Dezibel, Plastikbecher, Begleitpersone, Seggiuridi, Ruggsoogkontrolle odder wääs der Deifel woos noch gedocht. A Wunner, däss mir doss domols üüwerlabbt hömm! Womit denne rührige Faschingsvereine ömm Gottes Wille kee Vurwurrf gemocht wer söll, die junge Leut senn scho sellwer schuld oo der Entwicklung. Die Welt söll ömmer eefocher weer (Bürokratieabbau!), würrd owwer ömmer komplizierter. Woss früher a Schnupfe odder noch früher a Katarrh woor, iss heut ein „grippaler Infekt“. Wenn du früher schlicht Ranzewerrdich hast, redd merr heut hochtrabend vo a „Laktose-Intoleranz“. Schädelweh odder Kopfwerrdich iss heut nedd selten a „Glutenunverträglichkeit“. Und wenn merr früher gsocht hodd, däss die Oma und der Opa ab und zu a weng durchenanner senn, hömm die alte Leut heutzudooch „Demenz“ odder „Alzheimer“. Ich well doss üüwerhaupt nedd verharmlos odder lächerlich mach, owwer mir wösse heut halt nu emoll deutlicher mehr wie früher und doss hodd Folgen. Die „Lebensmittelinformationsverordnung“ zum Beispiel. Nooch der müsse seit gut a Johr aach bei alle offe verkäffte Lebensmittel wie Flääsch, Nüss, Gebäck, Brootwürscht offn Sportplatz, praktisch bei alle nedd verpackte Lebensmittel, die so genannte „Hauptallergene“ ausgewiese weer. 14 Stück senn doss (nedd erschreck!): Eier, Sesam, Soja, Milch, Sellerie, Gluten, Krebstiere, Fisch, Weichtiere, Senf, Erdnüsse, Lupinen, Schalenfrüchte und Schwefeldioxid/Sulfite. Gidds süsst üüwerhaupt noch woss?! Wie knallhart iss doo doch die Tierwelt! Ich möchte nedd gewöss, wie viel Katze a Laktose-Intoleranz hömm - und trotzdem Mellich in rauen Mengen saufe. Odder Gäul, die a Glutenunverträglichkeit hömm - und sich trotzdem jeden Dooch off ihrn Hafer fränn. Und wie viel Reh, Füchs odder Hoose hadde scho n Bänderriss, ohne n Gips zu grieche odder a kaputte Hüfte, a kaputts Knie, ohne in Werneck operiert wurrn zu senn. A Schmarrn, ich wääs. Owwer konn mersch nedd trotzdem a weng so gseh? Ich frääch jo bloß. Servus, der Eustach.