Neulich hobb ich g’hört, dässes Kitas odder Kinnergärrde geb söll, wo alle Spiele weg komme, bei denne die Kinner verlier könne. Verröggd, odder?! Schworrzer Bädder, Mensch ärger dich nicht, Quartett – weg, eefoch weg! Die Kinner sölle kee negative Erfolgserlebnisse hobb und bloß noch gewinn. Wie der FC Bayern halt. Doss konns doch nedd gsei! Die ganz Erziehung hodd sich in relativ kurzer Zeit komplett geändert. Früher iss Zeuch mit uns gemocht wurrn, doss wär heut undenkboor! S Schlochte vo a Sau zum Beispiel. Domols ganz selbstverständlich: wenn die Sau „tot gemocht“ wurrn iss, musste mir mit noch kee 10 Johr hie und s Schwänzle halt. Und zu gugg! Kee Sau hodd sich woss dabei gedocht! Heut? Unmöglich! Odder mir senn ins Durf römmgscheggt wurrn und musste irchendwelche Zettel für die Bauersleut ausdrooch. „Grüß Gott, Irma. Iss der Linus doo?“ „Naa, der iss dausses Mäusvergifte.“ Stell dir vuur, do iss heut a glee Büüwle vo a ganz fortschrittliche und modern erziehende Mutter dabei und der Klee erzählt doss dehemm. „Was?! Mäuse vergiften! Die kleinen, possierlichen Tierchen vergiften?! Wie grausam!“ Doss iss die Surrde Mütter, die, wenn a Zettel vonn Kinnergorrde künnt: „Achtung! Wir haben Läuse im Kindergarten“, seecht: „Ich finde es schön, wenn meine Kinder mit Tieren groß werden.“ Freilich! Und Niggelaus. Ganz aktuell. Früher ganz eefoch. Der Niggelaus hodd mit sein Knecht Ruprecht und die Rute scho bei’s Komme fast die Tür neigschlooche, wo merr n Vodder vo dinn sooche ghört hodd: „Fester!“ Und dann ins Wohnzimmer: die Keede neigschmisse, alle Kinnder drauf läss knien und a „Vater unser“ und a „Gegrüßet seist du Maria“ läss baad. Und wenn eener nedd weiter gewössd hodd: drauf! Und der Vodder mit sei fönnef Bier: „Fester!“ Und die Mutter naawe dro, mit drei Bier: „Jawoll, Vodder! Do hossde racht!“ Heut? Als Niggelaus musst du vuurher erscht frääch, ob der Ruprecht üüwerhaupt mit nei döff. Und nedd selten die Antwort: „Nein! Um Gottes Willen. Kein Ruprecht! Das Kind erschrickt sich.“ Ja, ja. Und woos wollte mir früher sooch? Der Niggelaus iss middn Soog komme, oo den a gless Kinnerbeele hie genäht wor. Und dinn a lewenndiche Hoosekuh, die gstrampelt hodd. „Gugg! Do iss scho eener dinn!“, hodd die Mutter gsocht. Hodds uns g’schodd? A weng scho, odder? Servus, der Eustach.