So, September hömmer, so langsam owwer sicher iss die für vill vo uns schönst Zeit im Johr widder römm. Die größt Hitz iss vorbei, die Dooch senn scho deutlich kürzer, die Äcker braun und vonn Urlaub komme die Leut aach widder langsam zurück. Und komisch: jeden hodds im Urlaub gfalle. Noch auße hie jedenfalls. Egal, obbs in ee Duur gereend hodd, a Riesen-Baustell direkt vuurs Hotel woor odder merr vuur lauter Hitz und Schnogge kee Nocht gscheit gschloff kannt: schö woorsch! Merr konn eefoch kee 2.000 € für die ganz Familie ausgeb, vuurher im Freundeskreis s größ Wurrd gführ, ömm dann hinnerher zugeb zu müsse, däss alles nix woor. Iss normal. Die Bayreuther Festspiele zum Beispiel senn jo jetzt nooch vier Woche Wagner-Singerei aach widder römm. Leut, die vuurher noch nie in a Oper worrn, bewerbe sich ömm Korrde, nur ömm irchendwenn aach amoll gsooch zu könne, dässe in Bayreuth in die Festspiele worrn. Woss well denn eener, der 10 Johr off zwee Korrde geworrd hodd, dann tatsächlich endlich zwee gricht hodd, zwösche 150 – 200 Euro pro Stück bezohlt hodd und vuurher wochenlang bei Verwandte unn Bekannte mit geprahlt hodd, däss er wie Merkel, Seehofer unn Co. jetzt aach amoll nei die Bayreuther Festspiele döff, annersch sooch? Doss muss eefoch schö gewasst sei! Aach wenn du nooch 30 Minudde „Tristan unn Isolde“ nedd gewössd hossd, wie du die brutto fönnef Stonn aushalt sösst: Schöö woorsch! N beste merkst du, dässes nix woor, wenn noochher eener seecht: „Also, merr musses amoll gsenn hobb!“ Doss iss a vernichtende Kritik! Ich hobb in Verona in die Arena amoll vier Stonn Aida mitgemocht. Alles off Italienisch! Doo woor nedd eener vo die Männer dabei, der nedd mindestens dreimol eigschloffe iss und in sei tiefstes Inneres für sich gedocht hodd: „In so woss brenge mich kee zääh Gäul merr nei!“ Owwer noochher, bevuurs widder nei n Bus gange iss, hörscht du ständig: „Subber, odder?“ „Ja, scho. Muss merr aach amoll mitgemocht hobb.“ Ja, merr mecht scho vill midd in sei Laawe. Böse Zunge behaupte jo, däss sich heuer in Bayreuth bei die Festspiele Folchendes zugedrooche hodd. Vuur die Rieseneingangstür oo die Kass wär a Schild ghängt: „Hunde müssen draußen bleiben!" Nooch die Vuurstellung, also fönnef Stonn später, hadd eener dazu gschriewe: „Der Tierschutzverein." Alles gloor? Servus, der Eustach.